Jalgaon News : खानदेशात यंदा कलिंगड लागवड (Kalingad Lagwad) वाढली आहे. अनेकांनी आगाप लागवड (नोव्हेंबर व डिसेंबरमध्ये) केली होती. या लागवडीच्या पिकातून उत्पादन अत्यल्प हाती आले आहे. याच वेळी दरही कमीच आहेत.
कलिंगडाची लागवड (watermelon Cultivation) खानदेशात यंदा सुमारे ४०० हेक्टरने वाढली आहे. ही लागवड सुमारे २१०० हेक्टरवर झाल्याचा अंदाज आहे. कोविड काळातही अनेकांना कलिंगड पिकाने तारले होते.
काही शेतकऱ्यांनी रमझान महिना हेरून लागवडी केल्या व दरही मिळवले होते. यंदाही याच हेतूने अनेकांनी लागवड केली. लागवड वाढली, पण प्रतिकूल वातावरण व कमी दर याचा फटका कलिंगड उत्पादकांना बसत आहे.
नोव्हेंबर व डिसेंबरमधील कलिंगड पिकातून उत्पादन हाती आले आहे. परंतु या महिन्यांत थंडी कमी होती. कमाल तापमान डिसेंबरमध्ये काही दिवस ३२ अंश सेल्सिअसवर होते. तर किमान तापमानही काही दिवस १८ अंश सेल्सिअसवर पोहोचले होते.
ढगाळ वातावरण अनेक दिवस या कालावधीत होते. जानेवारीतही काही दिवस ढगाळ आणि काही दिवस थंड वातावरण होते.
या विषम वातावरणाचा फटका पिकाला बसला. बुरशीजन्य समस्या पिकात होत्या. खर्च वाढला. कारण कीडनाशके, बुरशीनाशके व सोबत संप्रेरकांची गरज होतीच.
एकरी खर्च एक लाख रुपयांपर्यंत गेला. हा खर्च मागील वेळेस ६० ते ७० हजार रुपये प्रतिएकर होता. यातच एकरी फक्त पाच ते आठ टन उत्पादन अनेक शेतकऱ्यांना मिळाले. एकरी किमान २० ते २२ टन उत्पादन हाती येणे अपेक्षित होते.
कमी दर्जाची फळे काढणी टाळली
खानदेशात बाजार समितीत कलिंगडाची फारशी आवक होत नाही. खरेदी थेट जागेवर केली जाते. मागील हंगामात कमाल नऊ रुपये व किमान सात रुपये प्रतिकिलोचा दर जागेवर मिळाला होता. परंतु यंदा सुरुवातीलाच प्रतिकिलो पाच रुपये दर मिळाला आहे.
यात कमी दर्जाची फळे काढणी खरेदीदारांनी टाळली आहे. यामुळे कमी दर्जाची फळे शेतकऱ्यांना गावोगावी जाऊन विक्री करावी लागत आहेत. उत्पादन खर्चही अनेकांचा निघालेला नाही. पीक परवडले नसल्याने मोठा तोटा आला आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
