२४ स्टार्टअप्सना मिळणार १५ लाखांची वर्क ऑर्डर

मुंबई : राज्य शासनाच्या कौशल्य, रोजगार (Employment), उद्योजकता (entrepreneurship) व नावीन्यता विभागांतर्गत कार्यरत असलेल्या महाराष्ट्र राज्य नावीन्यता सोसायटीमार्फत तरुण आणि नवउद्योजकांच्या कल्पनांना चालना देण्यासाठी महाराष्ट्र स्टार्टअप सप्ताहाचे (Maharashtra Start Up week) आयोजन करण्यात येणार आहे. यामध्ये सहभागी होण्याकरिता अर्ज करण्यासाठी इच्छुक स्टार्टअप्सनी www.msins.in/startup-week या संकेतस्थळावरून ३० मेपर्यंत अर्ज करावा लागणार आहे.

स्टार्टअप्सची नावीन्यपूर्ण उत्पादने (Products And Services) आणि सेवा यांचे प्रकल्प शासकीय यंत्रणेत राबवून प्रशासनात नावीन्यता आणण्यासाठी प्रोत्साहन देण्यासाठी या सप्ताहाचे आयोजन केले आहे. याअंतर्गत प्राप्त अर्जांपैकी अव्वल १०० स्टार्टअप्सना त्यांच्या नावीन्यपूर्ण उत्पादने, सेवा यांचे सादरीकरण मंत्री, वरिष्ठ शासकीय अधिकारी, गुंतवणूकदार, तज्ज्ञ यांच्या समितीसमोर करण्याची संधी भेटते व त्यातील विजेत्या २४ स्टार्टअप्सना त्यांची नावीन्यपूर्ण उत्पादने, सेवा प्रायोगिक तत्त्वावर संबंधित शासकीय विभागांबरोबर राबविण्यासाठी नावीन्यता सोसायटीमार्फत १५ लाख रुपयांपर्यंतच्या वर्क ऑर्डर देण्यात येणार आहेत.

यामध्ये कृषी, शिक्षण व कौशल्य विकास, आरोग्य, प्रशासन, शाश्वतता (स्वच्छ ऊर्जा, जलव्यवस्थापन, कचरा व्यवस्थापन), स्मार्ट पायाभूत सुविधा आणि गतिशीलता आणि संकीर्ण या क्षेत्रांचा समावेश आहे. महाराष्ट्र स्टार्टअप सप्ताह या उपक्रमाच्या आतापर्यंत चार आवृत्त्या आयोजित केल्या गेल्या असून विजेत्या स्टार्टअप्सनी राष्ट्रीय आरोग्य मिशन, महाराष्ट्र प्रदूषण नियंत्रण मंडळ, महावितरण, ग्रामविकास विभाग, विविध महानगरपालिका, जिल्हा कार्यालये अशा विविध शासकीय संस्था, विभागांसोबत काम पूर्ण केले आहे.

यंदा आयोजित केलेल्या स्टार्टअप सप्ताहामध्ये राज्यासह देशभरातील कल्पक नवउद्योजक, तरुण-तरुणींचा सहभाग वाढावा यासाठी हा उपक्रम आयोजित केला आहे. अधिक माहितीसाठी ईमेल team@msins.in अथवा ०२२-३५५४३०९९ या दूरध्वनी क्रमांकावर कार्यालयीन वेळेत संपर्क साधावा, असे आवाहन करण्यात आले आहे.