पंकजा मुंडेंची पोस्ट समर्थकांना केवळ भावनिक आवाहन

बीड : माजी ग्रामविकासमंत्री आणि भाजप नेत्या पंकजा मुंडे यांनी तीन दिवसांपूर्वी केलेली फेसबुक पोस्ट आणि त्यानंतर त्यांच्या ट्विटर अकाउंटवरून भाजपचा उडालेला उल्लेख, याचा माध्यमे आणि राजकीय विश्लेषकांकडून परिस्थितीनुरूप वेगवेगळा अर्थ निघत आहे. परंतु, ही फेसबुक पोस्ट म्हणजे केवळ समर्थकांना केलेले भावनिक आवाहन असून, त्या कुठलीही वेगळी राजकीय भूमिका घेतील असे नाही, असे सूत्रांनी सांगितले.  

पंकजा मुंडे यांचा परळी मतदारसंघातून चुलतबंधू धनंजय मुंडे यांच्याकडून ३० हजारांवर मतांनी धक्कादायक पराभव झाला. त्यांनी माध्यमांसमोर पराभव स्वीकारत जबाबदारीही स्वत:वर घेतली. परंतु, अद्याप त्या जिल्ह्यात किंवा एखाद्या सार्वजनिक कार्यक्रमात आल्या नव्हत्या. त्यातच तीन दिवसांपूर्वी फेसबुक पोस्ट लिहिली आणि पोस्टमधील काही शब्दांमुळे त्या पक्षांतर करतील, भाजपमध्ये नाराज अशा विविध चर्चा आणि बातम्या सुरू झाल्या.  परंतु, गुरुवारी (ता. १२) दिवंगत लोकनेते गोपीनाथराव मुंडे यांची जयंती असून, त्यानिमित्त समर्थकांना गोपीनाथगडावर उपस्थित राहण्याचे आवाहन करण्यासाठी पोस्ट लिहिलेली आहे.

तशा, त्या भाजपमध्ये काही प्रमाणात नाराज असल्या तरी विद्यमान परिस्थिती पाहता इतर पक्षात त्यांना त्यांच्यायोग्य जागा मिळेल का, असाही प्रश्न आहे. तसेच त्यांच्या वडिलांनी ज्या पक्षात हयात घालविली तो पक्ष त्या कसा सोडतील, असाही प्रश्न आहे. मात्र, या पोस्टमध्ये त्यांच्या शब्दांना भावनिक झालर असल्याने वेगवेगळे अर्थ निघत असले तरी त्या भावनिक राजकारण करतात, असा विरोधकांचा आरोप आणि आपण भावनेने राजकारण करतो, असा पंकजा मुंडे यांचा दावा राहिला आहे. त्यामुळे ही पोस्टदेखील तशीच काहीशी आहे.

‘वेगळा विचार निव्वळ अफवा’ भाजपच्या पंकजा मुंडे यांनी केलेल्या फेसबुक पोस्टमुळे राजकीय वर्तुळात त्यांच्या संभाव्य पक्षांतराची चर्चा सुरू झाली. मात्र, प्रदेशाध्यक्ष चंद्रकांत पाटील यांनी पंकजा मुंडे वेगळा विचार करीत आहेत, ही निव्वळ अफवा असल्याचे सांगत या चर्चेला पूर्णविराम दिला.