पावसाच्या चुकीच्या आकडेवारीबाबत कृषी आयुक्तांकडून गंभीर दखल

पुणे : राज्याच्या कृषी विभागाकडून घेतल्या जाणाऱ्या पावसाच्या आकडेवारीमध्ये चुका असल्याची बाब निदर्शनास आल्यानंतर राज्याचे कृषी आयुक्त सचिंद्र प्रताप सिंह यांनी गंभीर दखल घेतली आहे. चुकीची आकडेवारी येणे ही बाब गंभीर असून, त्याबाबत सविस्तर अहवाल सादर करण्याचे आदेश आयुक्त सिंह यांनी संबंधित विभागाला दिले आहेत.  राज्यात एकाच ठिकाणी पडलेल्या पावसाच्या दोन वेगवेगळ्या नाेंदी हाेत असल्याचे, तसेच यात मोठी तफावत असल्याची बाब ‘अॅग्रोवन’ने निदर्शनास आणून दिली. त्यानंतर कृषी विभागाच्या संकेतस्थळ आणि ‘मोबाईल अॅप’वरून पावसाची मंडलनिहाय दैनंदिनी आकडेवारी प्रसिद्ध करणे बंद करण्यात आले. चुकीच्या आणि मोठी तफावत असलेल्या शेतकऱ्यांनी अाक्षेप नोंदविल्यानंतर ही आकडेवारी बंद केल्याने कृषी विभागाच्या नोंदीबाबत संभ्रम आणखी वाढला आहे.  कृषी विभाग आणि ‘स्कायमेट’ या खासगी संस्थेच्या माध्यमातून सुरू करण्यात आलेल्या ‘महावेध’ प्रकल्पाअंतर्गत राज्यातील सर्व मंडल स्तरांवर स्वयंचलित हवामान केंद्र बसविण्यात आली आहेत. यातून मानवी हस्तक्षेप विर.िहत स्वयंचलित पद्धतीने पाऊस, तापमान, वाऱ्याचा वेेग, दिशा, आर्द्रता या सर्व नोंदी कृषी विभागाला प्राप्त होत आहेत. मात्र,  काही तांत्रिक कारणामुळे चुकीची आकडेवारी संकेतस्थळावर प्रसिद्ध झाल्याचे कृषी विभागाच्या सूत्रांनी सांगितले.  याबाबत कृषी आयुक्त सचिंद्र प्रताप सिंह म्हणाले, की पूर्वी महसूल विभागाकडून घेतल्या जाणाऱ्या नोंदी कृषी विभागाला प्राप्त होत होत्या. आता ‘महावेध’ या प्रकल्पाअंतर्गत स्वयंचलित हवामान केंद्र बसविण्यात आली आहेत. ही स्वयंचलित हवामान केंद्र भारतीय हवामान विभागाकडून प्रमाणित करण्यात आलेली आहेत. यातून मिळणाऱ्या नोंदीमध्ये मानवी हस्तक्षेप नसल्याने त्यातील अचूकता वाढणार आहे. तांत्रिक अडचणीमुळे सध्या संकेतस्थळावर आकडेवारी प्रसिद्ध करणे बंद झाले आहे, लवकरच ही माहिती शेतकऱ्यांना उपलब्ध करून दिली जाईल.