कृषी तांत्रिक पदविका अभ्यासक्रम पूर्ववत सुरू होणार

मुंबई ः राज्यातील कृषी विद्यापीठांमधील बंद झालेला कृषी तांत्रिक पदविका अभ्यासक्रम पुन्हा सुरू करण्यावर महाराष्ट्र राज्य कृषी शिक्षण व संशोधन परिषदेने शिक्कामोर्तब केले आहे. राहुरी येथील महात्मा फुले कृषी विद्यापीठाने नियम धाब्यावर बसवून कृषी तांत्रिक पदविका अभ्यासक्रम बंद केल्याकडे विरोधी पक्षनेते राधाकृष्ण विखे पाटील यांनी सर्वप्रथम लक्ष वेधले होते. तसेच त्यानंतरही त्यांनी यासंदर्भात पाठपुरावा सुरू ठेवला होता.  प्रशासनाने ग्रामीण भागातील विद्यार्थ्यांचा विचार न करता हा अभ्यासक्रम बंद केला होता. त्यामुळे विद्यार्थ्यांना तांत्रिक शिक्षणापासून वंचित राहावे लागणार होते. या पार्श्वभूमीवर विखे पाटील यांनी तत्कालीन कृषिमंत्री स्व. पांडुरंग फुंडकर यांच्याशी संपर्क साधून हस्तक्षेप करण्याची मागणी केली होती. या निर्णयामुळे होणारे प्रतिकूल परिणाम निदर्शनास आणून दिल्यानंतर फुंडकर यांनी हा अभ्यासक्रम पूर्ववत करण्याचे आश्वासनही दिले होते. मात्र, दुर्दैवाने त्यांचे अकाली निधन झाले. त्यानंतर कृषी विभागाची जबाबदारी सोपवण्यात आलेले मंत्री चंद्रकांत पाटील यांच्याकडेही राधाकृष्ण विखे पाटील यांनी पाठपुरावा सुरूच ठेवला. कृषिमंत्री चंद्रकांत पाटील यांनी यासंदर्भात 18 जून रोजी बैठक घेतली होती.  ‘असोसिएशन ऑफ अॅग्री अॅंड अॅग्रो अलाइड कॉलेजेस’ या संघटनेनेही मुंबई येथे कृषिमंत्र्यांची भेट घेऊन या निर्णयामुळे ग्रामीण भागावर होणाऱ्या परिणामांची माहिती दिली होती. कृषिमंत्र्यांनी संघटनेच्या सदस्यांची बाजू समजून घेतली व सकारात्मक प्रतिसाद दिला. या वेळी झालेल्या चर्चेत कृषी तंत्रनिकेतन अभ्यासक्रम बंद करण्याच्या कृषी विद्यापीठाच्या निर्णयाचे गांभीर्य आणि त्यामुळे ग्रामीण भागातील विद्यार्थ्यांचे होणारे मोठे नुकसान कृषिमंत्र्यांच्या निदर्शनास आणून दिले होते. अखेर महाराष्ट्र राज्य कृषी शिक्षण व संशोधन परिषदेने कृषी विद्यापीठांमधील हा अभ्यासक्रम पूर्ववत करण्याच्या निर्णयावर शिक्कामोर्तब केले असून, त्यामुळे ग्रामीण भागातील विद्यार्थ्यांना दिलासा मिळाला आहे.