कसणाऱ्यांच्या नावे सातबारा न निघाल्यास पुन्हा लाँग मार्च ः जिवा पांडू गावित

सुरगाणा, जि. नाशिक : वनजमीन नावावर होऊन कसणाऱ्याच्या नावे येत्या तीन महिन्यांत सातबारा न निघाल्यास पुन्हा एकदा कळवण ते मुंबई असा लाँग मार्च काढून लाल वादळाची ताकद सरकारला दाखवू, असा इशारा आमदार जिवा पांडू गावित यांनी दिला. हुतात्मा लक्ष्मण बागुल यांच्या स्मृतीदिनानिमित्त बुधवारी (ता. १३) सुरगाणा तहसील कार्यालयावर काढलेल्या मोर्चाप्रसंगी ते बोलत होते. यावेळी डॉ. अशोक ढवळे, किसन गुजर, सुनील मालुसरे, सभापती सुवर्णा गांगुर्डे, उपसभापती इंद्रजित गावित, सावळीराम पवार, रामजी गावित, भिका राठोड, रमेश वाडेकर, विजय घांगळे, धनजी चौधरी, उत्तम कडू, मनिषा महाले, नगराध्यक्ष सोनाली बागुल, नगरसेवक अकील पठाण, राजुबाबा, सुरेश गवळी, सुभाष चौधरी, धर्मेंद्र पगारीया, कळवणचे हेमंत पाटील, मोहन जाधव, जगन माळी, बाबाजी जाधव, राजाराम गांगुर्डे, वैभव जाधव, नीलेश जाधव, उपविभागीय अधिकारी अमन मितल, तहसीलदार दादासाहेब गिते, गटविकास अधिकारी केशव गड्डापोड, गटशिक्षणाधिकारी संजय कुसाळकर आदीसह सर्व शासकीय विभागाचे अधिकारी उपस्थित होते.   या वेळी गावित म्हणाले, मुंबईच्या मोर्चात मुख्यमंत्र्यांनी सर्व मागण्यांची पूर्तता येत्या सहा महिन्यांत करण्याचे आश्‍वासन दिले होते. परंतु, तीन महिन्यांचा कालावधी लोटूनही अद्याप मागण्यांसंदर्भात कोणत्याही हालचाली सरकारकडून सुरू झालेल्या नाहीत. त्यामुळे पुन्हा एकदा सर्वांनी मुंबईच्या मोर्चाकरिता तयार राहावे. सध्या पात्र दाव्यांची वनजमिनीची मोजणी जीपीआरएसने सुरू आहे. ती दोन हजार पाचच्या गुगल मॅपशी मॅच झाल्यास तेवढी जमीन मिळेल. वनजमिनीची मोजणी करताना महसूल विभाग, वनविभागाचे कर्मचारी उपस्‍थित राहाणे गरजेचे होते. मात्र, ते का उपस्थित राहिले नाहीत त्यांच्यावर कारवाई झाली पाहिजे.