मॉन्सूनची दे धडक !

पुणे : केरळमध्ये यंदा वेळेआधी हजेरी लावल्यानंतर महाराष्ट्रात माॅन्सून दाखल होण्यास करावी लागलेली प्रतीक्षा अखेर संपली. मृग नक्षत्रास शुक्रवारी (ता.८) प्रारंभ होताच मॉन्सूनचे महाराष्ट्रात दिमाखात आगमन झाल्याचे हवामान विभागाने जाहीर केले. राज्यात दक्षिण कोकण, दक्षिण मध्य महाराष्ट्र, मराठवाडा, विदर्भातील काही भागात मॉन्सूनने धडक दिली असून रत्नागिरी, सोलापूर, नांदेडपर्यंतचा भाग माॅन्सूनने व्यापला आहे. आज (ता.९) मुंबईसह महाराष्ट्राच्या आणखी काही भाग माॅन्सून व्यापणार असल्याचे हवामान विभागाने स्पष्ट केले आहे.  मॉन्सून साधारणत: ७ जून रोजी तळकोकणातून महाराष्ट्रात दाखल होतो. यंदा मॉन्सून ६ ते ८ जूनच्या दरम्यान राज्यात दाखल होईल, असे हवामान विभागाने यापूर्वी जाहीर केले होते. त्याप्रमाणे शुक्रवारी (ता.८) मॉन्सूनने हजेरी लावली. अरबी समुद्रात महाराष्ट्र आणि कर्नाटक किनारपट्टीलागत हवेचा कमी दाबाचा पट्टा (ट्रफ) सक्रिय असल्याने त्यामुळे माॅन्सूनचे आगमन प्रभावित झाले होते. केरळात नियोजित वेळेच्या (१ जून) तीन दिवस आधीच (२९ जून) धडक देणाऱ्या मॉन्सूनने महाराष्ट्रापर्यंतची वाटचाल पूर्ण करण्यास तब्बल ११ दिवसांचा कालावधी घेतला. गोवा, कर्नाटक आणि रायलसिमा उर्वरित भाग व्यापून शुक्रवारी मध्य अरबी समुद्र, महाराष्ट्राच्या दक्षिण भागासह संपूर्ण तेलंगणा, दक्षिण छत्तीसगड, ओडिशा, आंध्र प्रदेशाच्या आणखी काही भागापर्यंत मजल मारली आहे.  माॅन्सूनच्या पुढील वाटचालीस पोषक हवामान असल्याने आज (शनिवारी) मुंबईसह महाराष्ट्राच्या आणखी काही भाग, संपूर्ण आंध्र प्रदेश, छत्तीसगड, ओडिशाच्या आणखी काही भागात मॉन्सून धडक देईल; तर सोमवारपर्यंत (ता.११) मॉन्सून संपूर्ण महाराष्ट्र व्यापून गुजरात, मध्य प्रदेशच्या काही भागात माॅन्सून पोचण्याची शक्यता आहे. बंगालच्या उपसागरात आज (ता.९) कमी दाबाचे क्षेत्र तयार होणार असून, ईशान्य भारतासह पश्‍चिम बंगाल, सिक्कीमध्येही मॉन्सूनची प्रगती शक्य असल्याचे हवामान विभागातर्फे सांगण्यात आले.

कोकण, दक्षिण महाराष्ट्रात अतिवृष्टी मॉन्सूनचे राज्यात आगमन झाल्याने मुंबईसह, कोकण, दक्षिण मध्य महाराष्ट्रात आज (ता. ९) काही ठिकाणी अतिवृष्टी होण्याचा इशारा हवामान विभागाने दिला आहे. सोमवारपर्यंत (ता. ११) कोकणात पावसाचा जोर कायम राहणार असून, रविवारी (ता. १०) मध्य महाराष्ट्रात, मराठवाड्यात तुरळक ठिकाणी मुसळधार पावसाचा अंदाज आहे. तर सोमवारपर्यंत मराठवाडा आणि विदर्भातही काही ठिकाणी पाऊस पडणार असल्याचे हवामान विभागाने स्पष्ट केले आहे. गेल्या काही वर्षांतील मॉन्सूनचे महाराष्ट्रातील आगमन