मागणीनंतरच तणनाशक, कीटकनाशकाला परवानगी

यवतमाळ: कीडकनाशक, कीटकनाशक मिश्रणामुळे मागील वर्षी अनेक शेतकरी व शेतमजुरांना विषबाधा झाली होती. त्यानंतर तणनाशक व सहा मॉलिक्‍यूलला जिल्ह्यात बंदीचे तोंडी आदेश होते. आता कृषी सेवा केंद्रांना आधी मागणी करावी लागणार असून, त्यानंतरच परवानगी देऊन तणनाशक, कीटकनाशकाला कृषी सेवा केंद्रांच्या परवान्यामध्ये समाविष्ट केले जाणार आहे. मागील वर्षीच्या खरीप हंगामात कपाशीवर फवारणी करताना अनेक शेतकरी व शेतमजुरांना विषबाधा झाली होती. त्यात २२ शेतकरी व शेतमजुरांचा मृत्यू झाला. ७५० वर शेतकरी व शेतमजूर बाधित झाले. विषबाधेचे कारण शोधले असता, काही ठिकाणी तणनाशक, तर काही ठिकाणी कीटकनाशकांचे मिश्रण जबाबदार असल्याचा निष्कर्ष कृषी विभागाने काढला. त्यामुळे यंदा खबरदारीचा उपाय म्हणून जिल्ह्यात सहा कीटकनाशक व तणनाशकांना विक्री बंदीचे तोंडी आदेश होते. परिणामी, जिल्ह्यात सध्या तणनाशक व सहा कीटकनाशकांना विक्री परवानगी नव्हती. आता, कृषी सेवा केंद्र संचालकांच्या वैयक्तिक मागणीनंतरच कृषी सेवा केंद्र चालकांना परवानगी दिली जाणार आहे. शिवाय, त्यानंतर परवान्यात त्या कीटकनाशक, तणनाशकांची नोंद केली जाणार आहे.