जमीन प्रकारानुसार पीक जातींची निवड : चव्हाण

जमीन प्रकारानुसार पीक जातींची निवड ः तुषार चव्हाण
जमीन प्रकारानुसार पीक जातींची निवड ः तुषार चव्हाण

शिल्लेगाव, जि. औरंगाबाद : गुलाबी बोंड अळीच्या प्रादुर्भावानंतर गुजरात राज्यात या किडीच्या नियंत्रणासाठी केलेल्या उपाययोजनांची चर्चा होत आहे. सर्वांनी मिळून केलेल्या उपाययोजनातून गुजरात पॅटर्नचा जन्म झाला. तशी उपाययोजना आपल्या राज्यातील शेतकऱ्यांनी केल्यास गुलाबी बोंड अळीच्या नियंत्रणाचा पॅटर्न तयार होऊ शकतो, असे मत गांधेली येथील एमजीएम कृषी विज्ञान केंद्रातील तज्ज्ञ तुषार चव्हाण यांनी व्यक्‍त केले. 

शिल्लेगाव (ता. गंगापूर) येथे आयोजित चर्चासत्रात प्रमुख मार्गदर्शक म्हणून ते बोलत होते. `ॲग्रोवन` आणि `स्मार्टकेम टेक्‍नॉलॉजीज लि.` यांच्या संयुक्‍त विद्यमाने शेतकरी संवाद कार्यक्रमाचे आयोजन केले होते. अध्यक्षस्थानी प्रगतिशील शेतकरी बाळासाहेब वाघ होते. या वेळी महाधन, स्मार्टकेम टेक्‍नॉलॉजीज लि. चे विभागीय विक्री व्यवस्थापक एच. टी. भिसे, कृषी सहायक वर्षा हिवाळे आणि परिसरातील शेतकरी उपस्थित होते.

चव्हाण म्हणाले की, पेरणी करताना खासकरून कपाशीच्या जातींची जमिनीच्या मगदुराप्रमाणे निवड महत्त्वाची ठरते. पावसाचे प्रमाण कमी असणाऱ्या भागातील शेतकऱ्यांनी कमी कालावधीत येणाऱ्या जातींची निवड करावी. जमिनीतील सेंद्रिय कर्बाचे प्रमाण कमी झाले आहे. हे लक्षात घेऊन सेंद्रिय खते, जिवाणू संवर्धकांचा वापर करावा. किडींचे सर्वेक्षण आणि प्रादूर्भाव रोखण्याच्या पद्धतींचा वापर समजावून घ्यावा. रासायनिक कीडनाशकांचा शिफारशीनुसारच वापर करावा. पारंपरिक पिकांच्या बरोबरीने रेशीम शेती हादेखील चांगला पर्याय आहे. 

 स्मार्टकेम टेक्‍नॉलॉजीज लि. चे विभागीय विक्री व्यवस्थापक एच. टी. भिसे यांनी खत वापराच्या तंत्रातील बदल समजावून सांगितले. ते म्हणाले की, खताची पिकाला उपलब्धता होण्यासाठी जमिनीचा सामू नियंत्रित ठेवावा. शिफारशीनुसार रासायनिक खतांचा वापर केल्यास अपेक्षित पीक उत्पादन मिळविणे शक्य आहे.

कृषी सहायक हिवाळे यांनी शेततळे, अस्तरिकरण, पीकविमा योजना, गोपीनाथ मुंडे शेतकरी अपघात विमा योजनेची माहिती दिली. सूत्रसंचालन ॲग्रोवनचे वितरण प्रतिनिधी सुनील दाभाडे यांनी केले. तर ॲग्रोवनचे प्रतिनिधी संतोष मुंढे यांनी आभार मानले. चर्चासत्राच्या यशस्वीतेसाठी `सकाळ`चे बातमीदार विठ्ठल नरोडे, `स्मार्टकेम`चे जिल्हा विक्री अधिकारी अमोल बोडखे आदींनी प्रयत्न केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com