Team Agrowon
समोरचं प्रसन्न वातावरण पाहून आणखीच प्रसन्न झालो. गोदावरी नदीच्या बंधाऱ्याचा पाणी परतावा बरबड्यापर्यंत आलेला आहे.
समोर अथांग पाणीच पाणी दिसत होतं. सगळीकडं धुकं पसरलेलं होतं. त्यामुळे वातावरण एकदम थंड. रात्रीही थंडीनं चुणूक दाखवली होती.
तीन पांघरूनं घेऊनही थंडी ऐकत नव्हती. ती थंडी आता बाहेर आणखीच जाणवत होती. पण या प्रसन्न वातावरणात फिरण्याची मजाही वाटत होती.
आम्ही परताव्याच्या पाण्यावरचा पूल ओलांडून काल जिथं हुरडा पार्टी केली त्या दिलीपराव धर्माधिकारी यांच्या शेताकडंच निघालो होतो. पण मध्येच एक पांदण दिसली, त्या पांदणीत शिरलो.
त्या पांदणीतून जाताना मोरांचा एक थवा पांदण ओलांडून या रानातून त्या रानात उडत जाताना दिसला. आणि मन मोरपंखी झालं.
थोडं पुढं चालत गेल्यावर पांदणीला एक पायवाट फुटलेली दिसली. आम्ही पुन्हा पांदण सोडली आणि त्या पायवाटेनं रानात शिरलो. ज्वारीच्या शेतातून चाललो. सूर्य नुकताच उगवू लागला. .