Kharip Sowing: शेतकऱ्यांना मदत करण्यासाठी शेतकरी पुत्राचा पुढाकार

‘ट्रॅक्टर आमचे डिझेल तुमचे,’ अशा प्रकारची मोहीम हातात घेतली आहे. भरोसा (ता. चिखली) येथील प्रहार जनशक्ती पक्षाचे श्रीकृष्ण थुट्टे (Shrikrushna Thutte) यांनी सरकारी यंत्रणांची मदतीची अपेक्षा न ठेवता शेतकऱ्यांसाठी मदतीचा हात पुढे केला आहे.

शेतकऱ्यांना दुबार पेरणीसाठी मदत सुरू केली आहे. यंदा बऱ्याच ठिकाणी मृग नक्षत्र पावसाअभावी कोरडे गेले. त्यामुळे शेतकऱ्यांना जून महिन्याच्या शेवटच्या आठवड्यात पेरणीला (Kharip Sowing) सुरुवात करावी लागली.

शेतकऱ्यांनी पेरणीयंत्राच्या साह्याने सोयाबीनची (Soybean) पेरणी केली. परंतु या भागात अचानक मुसळधार पाऊस पडला. त्यामुळे पेरलेल्या सोयाबीनच्या बियाण्यांवर मातीचा थर जमा झाला.

यामुळे ते सोयाबीन (Soybean Seed) बियाणे उगवलेच नाही. या कारणामुळे आसपासच्या परिसरातील शेतकऱ्यांवर दुबार पेरणीचे संकट कोसळले.

अनेक शेतकऱ्यांना पीककर्ज (Crop Loan) माफीचा लाभ मिळाला नसल्यामुळे त्यांनी उसनवारी करून, घरातील धनधान्य विकून पेरणी केली.

आता बँक तर पीककर्ज देत नाही. अशातच शेतकऱ्यांवर दुबार पेरणीचे संकट निर्माण झाले. त्यामुळे खते, बी-बियाणे बाजारातून कशी खरेदी करावे, हा प्रश्‍न आहे. अशावेळी शेतकऱ्यांना आधार देण्यासाठी थुट्टे यांनी आपले ट्रॅक्टर दुबार पेरणीसाठी उपलब्ध करून दिले आहे.