Team Agrowon
महात्मा गांधी राष्ट्रीय ग्रामीण रोजगार हमी योजना म्हणजेच मनरेगातून यंदा वर्षभरात ६० हजार हेक्टरवर फळबाग लागवड करण्याचे उद्दिष्ट ठेवण्यात आले आहे.
गेल्या वर्षी उद्दिष्ट पूर्ण करणाऱ्या १८ जिल्ह्यांसह उद्दिष्टाच्या सर्वाधिक २२३ टक्के लागवड पूर्ण करणाऱ्या गोंदिया जिल्ह्याचे विशेष कौतुक केले आहे.
राज्यात गेल्या काही वर्षांपासून फळबाग लागवडीला शेतकऱ्यांकडून प्राधान्य दिले जात आहे.
पाच हेक्टरच्या आतील व जॉब कार्ड असलेल्या शेतकऱ्यांना फळबाग लागवड करण्यासाठी मनरेगातून फळबाग लागवड केली जात आहे.
मात्र, पाच हेक्टरपेक्षा अधिक क्षेत्र असलेल्या शेतकऱ्यांना फळबाग लागवडीसाठीची स्व. भाऊसाहेब फुंडकर फळबाग लागवड योजना कोरोनाच्या काळात बंद होती. ती योजनाही गेल्या वर्षीपासून सुरू झाली आहे.
त्यामुळे राज्यात फळबाग लागवडीला वेग येताना दिसून येत आहे. गेल्या तीन वर्षांपासून राज्यात प्रतिवर्षी साठ हजार हेक्टरवर फळबाग लागवडीचे उद्दिष्ट देण्यात आलेले होते.
गेल्यावर्षी फळबाग लागवडीचा नवीन मापदंड वेळेत निश्चित न झाल्यामुळे पुरेशी लागवड होऊ शकली नाही. यंदा मात्र पावसाळ्या आधीच राज्यातील कृषी विभागाकडून नियोजन सुरू आहे.