Team Agrowon
कोल्हापूर जिल्ह्यातून दरवर्षी होणारी सुमारे ३० लाख फुलांची निर्यात यंदा पूर्णपणे ठप्प आहे.
जिल्ह्यातील गुलाब फूल उत्पादक सध्या स्थानिक बाजारपेठेवरच अवलंबून आहेत. सध्या गुलाबास देशांतर्गत बाजारपेठेत ८ ते १४ रुपयांपर्यंतचा दर मिळत आहे.
अजूनही फूल उत्पादक लग्नसराईसाठी गुलाब काढणीलाच प्राधान्य देत आहेत. अकरा तारखेनंतरच देशांतर्गत बाजारात ‘व्हॅलेंटाइन डे’साठी गुलाबाची मागणी वाढण्याची शक्यता आहे.
ढगाळ हवामानामुळे परिपक्वता लवकर आल्याने पंधरवड्यापूर्वीच फुलांची आवक बाजारात वाढली. आता आवक कमी झाली आहे.
बदलत्या हवामानामुळे फूल उत्पादकांना फटका बसत आहे. मध्यंतरीच्या काळात थंडी आणि ढगाळ हवामान असे संमिश्र वातावरण राहिले.
‘व्हॅलेंटाइन डे’च्या अंतिम टप्प्यात स्थानिक बाजारात फुलाची दरवाढ होईल, अशी अपेक्षा फूल उत्पादकांची आहे.
कोरोना पूर्वी कोल्हापूर जिल्ह्यातून प्रत्येक वर्षी सुमारे ३० लाख फुलापर्यंत निर्यात होत होती.
विशेष करून शिरोळ तालुक्यात मातब्बर उत्पादक होते. २५ जानेवारीपासून हरितगृहामध्ये फुले परदेशात पाठवण्यासाठी लगबग सुरू असायची.
मागणी नसल्याने कोट्यवधी रुपयाचा दणका फूल उत्पादकांना बसला. या फटक्यातून आजपर्यंत फूल उत्पादक सावरला नाही.