Team Agrowon
आंतरराष्ट्रीय पौष्टिक तृणधान्य वर्षाच्या निमित्ताने मंत्रालयातील आवारात महाराष्ट्र मिलेट मिशन या कार्यक्रमाचा शुभारंभ करण्यात आला.
या कार्यक्रमाला राज्याचे मुख्यमंत्री एकनाथ शिंदे,उद्योग मंत्री उदय सामंत, शालेय शिक्षण मंत्री दीपक केसरकर,आ.भरत गोगावले,आ. जयस्वाल,कृषी विभागाचे प्रधान सचिव एकनाथ डवले,कृषी आयुक्त सुनील चव्हाण उपस्थित होते.
तसेच शेतकरी व कृषी विभागाचे अधिकारी मोठ्या प्रमाणात उपस्थित होते.
या वेळी मंत्रालयात शेतकरी उत्पादक कंपन्यांनी तयार केलेल्या भरडधान्यांच्या उपपदार्थांची दालने उभारण्यात आली असून येथे विविध पदार्थांची विक्रीही केली जात आहे.
या वेळी मुख्यमंत्री शिंदे म्हणाले, ‘‘महाराष्ट्रात मोठ्या प्रमाणात ज्वारी, बाजरी, नाचणी, वरई, राळा, कुटकी ही पिके घेतली जातात.
या पिकांना आंतरराष्ट्रीय पातळीवरील मान्यता मिळवून देण्यास यंदा संयुक्त राष्ट्रसंघातर्फे साजरे होणारे आंतरराष्ट्रीय पौष्टिक तृणधान्य वर्ष उपयुक्त ठरेल.
महाराष्ट्र मिलेट मिशनमुळे नवी पिढी जंकफूडकडून पारंपरिक तृणधान्याद्वारे बनविलेल्या पदार्थांकडे निश्चितपणे वळेल. शेतकऱ्यांच्या उत्पादनालाही चांगला भाव मिळेल.