Lumpy Skin : ‘लम्पी’ लसीकरणासाठी प्रति जनावरामागे २० रुपये आकारणी

नाशिक : जिल्ह्यात सिन्नर तालुक्यात जनावरांमध्ये ‘लम्पी स्कीन’चा प्रादुर्भाव (Lumpy Skin Outbreak) निष्पन्न झाल्याने पशुसंवर्धन विभागाने (Department Of Animal Husbandry) युद्ध पातळीवर काम सुरू केले. ही परिस्थिती नियंत्रणात ठेवण्यासाठी क्षेत्रीय पातळीवर कर्मचारी मेहनत घेत आहेत. परंतु काही खासगी पशुवैद्यक (Lumpy Skin Vaccination) जनावरांमागे २० रुपये आकारत असल्याने करंजगाव (ता. निफाड) येथील पशुपालकांनी जिल्हा पशुसंवर्धन उपायुक्त डॉ. बाबूराव नरवडे यांच्याकडे तक्रार केली आहे.

‘लम्पी’च्या पार्श्वभूमीवर पशुपालकांमध्ये भीतीचे वातावरण असून जनावरांना प्रादुर्भाव नको, यासाठी सावध पवित्रा घेत लसीकरण करून घेतले जात आहे. मात्र लस मोफत असल्याचे पशुसंवर्धन विभागाकडून जाहीर करण्यात आले आहे.

असे असताना पशुसंवर्धन विभागाकडून लसीकरण होत नसल्याने ही तक्रार करण्यात आली आहे. या बाबत निफाड तालुक्यातील करंजगाव येथील पशुपालकांनी ही कैफियत ‘ॲग्रोवन’कडे मांडली आहे.

पशुसंवर्धन विभागाच्या कर्मचाऱ्यांकडून ही लस दिल्यास ती मोफत मिळते; तसेच खासगी पशुवैद्यकाने पशुसंवर्धन विभागाकडून लस घेऊन दिल्यास तीही मोफत आहे. त्यापोटी खासगी पशुवैद्यकांना प्रति जनावर तीन रुपये देण्याची तरतूद पशुसंवर्धन विभागाने केली आहे. त्यामुळे पशुपालकांकडून पैसे मागण्याचा किंवा दर आकारण्याचा कुठलाही मुद्दा उपस्थित होत नाही, अशी माहिती जिल्हा पशुसंवर्धन उपायुक्त डॉ. बाबुराव नरवडे यांनी दिली.

पशुसंवर्धन विभाग शेतकऱ्यांच्या दारात का जात नाही?

जनावरांना लस देण्याकरिता खासगी कर्मचारी काम करत आहेत. मात्र शासकीय पशुवैद्यकीय अधिकारी लस देण्यासाठी शेतकऱ्यांच्या दारात का जात नाही? या संदर्भात मोठा प्रश्न पडला आहे. जनावरांना ‘लम्पी’ आजाराची लस नक्की दिली जाते का? लस मोफत असताना २० रुपये घेत आहेत. हा प्रकार स्वाभिमानी शेतकरी संघटनेचे माजी तालुकाध्यक्ष राम राजोळे यांनी लक्षात आणून देत पशुसंवर्धन विभागाचे पत्राद्वारे लक्ष वेधले आहे.