जनावरांचे फऱ्या विरोधी लसीकरण सुरु झालंय?

पावसाळा सुरु झाला कि वातावरणात अनेक बदल होत असतात. या बदलत्या वातावरणात अनेक सुक्ष्मजीवाणुची वाढ जोमाने होत असते. पावसाळ्यात (rainy season)जनावरांना अनेक रोगांची बाधा होण्याची शक्यता वाढते. त्यापैकीच एक म्हणजे एक टांग्या (black quarter) आजार. सुदृढ किंवा मांसल पेशी जास्त असलेल्या जनावरांमध्ये या आजाराचा प्रादुर्भाव जास्त दिसून येतो. म्हशींमध्ये (buffalo)फऱ्या आजाराचे प्रमाण कमी असते. हा आजार क्लोस्ट्रीडीयम चोवाय (Clostridium Chovai) या जिवाणूमुळे होतो

- या आजारामध्ये जनावरांच्या पायाच्या भागावर सूज आल्याने, जनावरे लंगडायला लागतात.

- सूज आलेल्या ठिकाणी दाबून पाहिल्यास, चरचर असा आवाज येतो.

- जनावरांना ताप येऊन, तापाची तीव्रता १०४ अंश फॅरनहाइटपेक्षा जास्त असते.

- जनावरांचे खाणे-पिणे कमी होऊन रवंथ करण्याची प्रक्रिया मंदावते.

- बाधित जनावरांवर वेळीच उपचार न केल्यास १२ ते ४८ तासामध्ये जनावरे दगावू शकतात.

फऱ्या आजारावर एकमात्र उपाय म्हणजे पावसाळ्यापूर्वी या रोगाविरुद्ध जनावरांचे प्रतिबंधात्मक लसीकरण करून घेतलं पाहिजे. गाय, बैल आणि नवजात वासरांमध्ये या आजारचे प्रमाण जास्त असते. या आजाराची बाधा झाल्यास पशुपालकांना उपचाराचा खर्चकरावा लागतो. वेळेत योग्य ते उपचार न झाल्यास जनावर दगावण्याची शक्यता असते.

असं होऊ नये म्हणून राज्याच्या पशुसंवर्धन विभागांतर्गत राज्याच्या काही भागात घटसर्प आणि फऱ्या रोगाविरुद्ध प्रतिबंधात्मक लसीकरण सुरु झालंय. तुम्ही तुमच्या पशुधनाचं केलं नसेल तर करून घ्या.