Lumpy Skin : सांगलीत लसीकरणानंतरही वाढतोय लम्पी स्कीनचा संसर्ग

सांगली ः जिल्ह्यात लम्पी स्कीन (Lumpy Skin) आजाराचा प्रादुर्भाव सुरू झाल्यानंतर पशुसंवर्धन विभागाने गो वर्गीय जनावरांच्या लसीकरणास (Vaccination) प्रारंभ केला. जिल्ह्यातील ३ लाख ३७ हजार ४४१ गो वर्गीय जनावरांचे लसीकरण करण्यात आले आहे. जनावरांचे शंभर टक्के लसीकरण झाले असले तरी लम्पी स्कीनचा संसर्ग वाढत आहे. यामुळे पशुपालांमध्ये भीतीचे वातावरण निर्माण झाले आहे.

जिल्ह्यात गेल्या दोन महिन्यांपासून गो वर्गीय जनावरांना लम्पी स्कीनची लागण होत आहे. जिल्ह्यात २ हजार ३२४ जनावरांना लम्पी स्कीनचा प्रादुर्भाव झाला आहे. वाळवा तालुक्यातून या आजाराचा संसर्ग सुरू झाला. हळूहळू तो जिल्हाभर पसरला. जिल्ह्यातील प्रत्येक तालुक्यात जनावरांना लम्पी स्कीनचा संसर्ग होत असल्याचे आढळून आले आहे. प्रादुर्भाव सुरू होताच प्रशासनाने जनावरांच्या आठवडे बाजारांवर तसेच पर जिल्ह्यातून येणाऱ्या जनावरांवर बंदी घातली, असे प्रतिबंधात्मक उपाय सुरू केले. त्यासोबतच बाधित जनावरांपासून पाच किलोमीटरच्या परिघातील जनावरांचे लसीकरण सुरू केले. त्यानंतर लसीकरण वाढवून सर्व गो वर्गीय जनावरांचे लसीकरण करून घेतले. लम्पी स्कीनचा संसर्ग रोखण्यासाठी असे सर्व प्रयत्न सुरू असले तरी त्याचा प्रादुर्भाव दिवसेंदिवस वाढत आहे. त्यामुळे शेतकऱ्यांची चिंता वाढली आहे. जिल्ह्यात रोज सुमारे शंभरहून अधिक जनावरांना लम्पी स्कीन आजाराचा प्रादुर्भाव होत आहे.

दरम्यान, ऊस तोडीसाठी टोळ्या दाखल होणार असल्याने लसीकरण झालेल्या जनावरांना परवानगी देण्यात आली. त्यामुळे साखर कारखान्यांनी त्याबाबत काळजी घेतली आहे. लसीकरण झाल्यानंतरही जनावरांमध्ये संसर्ग होत असल्याने शेतकऱ्यांची डोकेदुखी वाढली आहे. जिल्ह्यात गाय आणि बैल वर्गातील जनावरांची एकूण संख्या तीन लाख ३७ हजार ४४१ आहे. या सर्वांचे लसीकरण करण्यात आले आहे. त्यातूनही जनावरांना लम्पी स्कीनची लागण होत आहे.