Lumpy Skin : परभणी जिल्ह्यात म्हशींच्या वाहतुकीस अटींसह परवानगी

परभणी : ‘‘लम्पी स्कीन (Lumpy Skin) आजाराच्या प्रादुर्भावाच्या पार्श्‍वभूमीवर म्हशींच्या वाहतुकीस (Cattle Transport) अटींसह परवानगी देण्यात आली आहे. म्हशींची आरोग्य प्रमाणपत्रासह संक्रमित नसलेल्या क्षेत्रातून वाहतूक केली जाऊ शकते,’’ अशी माहिती जिल्हा पशुसंवर्धन (Livestock) उपायुक्त डॉ. पी. पी. नेमाडे (Dr. P,P, Nemade) यांनी दिली.

लम्पी स्कीन आजाराचा प्रसार रोखण्यासाठी राज्यभरातील बाधित क्षेत्रातून ईपी सेंटर (केंद्र गाव)पासून एक कि.मी.च्या आत म्हशींच्या हालचालींवर निर्णायकपणे लक्ष ठेवणे आवश्यक आहे. म्हशींच्या नियमित आरोग्य प्रमाणपत्रासह संक्रमित नसलेल्या क्षेत्रातून (घोषित ईपी सेंटर व्यतिरिक्त क्षेत्र) वाहतूक केली जाऊ शकते.

प्रादुर्भावग्रस्त क्षेत्रातील म्हशींची पशुवैद्यकांमार्फत तपासणी करावी. जनावरांना सौम्य लक्षणे दिसली तरीही त्यांना हालचाल करण्यास परवानगी देऊ नये. वाहतूक करण्यापूर्वी सोबत प्राधिकरणाचे आरोग्य प्रमाणपत्र असावे. शक्यतो वाहतुकीपूर्वी पीसीआर चाचणी करून घ्यावी. त्याचा अहवाल नकारार्थी असावा, या अटी देण्यात आल्या आहेत.

पशुसंवर्धन आणि दुग्ध व्यवसाय विभाग, मत्स्य व्यवसाय, पशुसंवर्धन व दुग्ध व्यवसाय मंत्रालय, भारत सरकार यांनी निर्देशित केल्यानुसार, म्हशींमध्ये लम्पी स्कीनची सौम्य लक्षणे दिसून आली आहेत. त्याची तीव्रता अत्यल्प आहे.