मेंढपाळांच्या वाड्यावर पोहोचले तीस डॉक्टर

पथ्रोट, जि. अमरावती : काळा खडक व जनुना येथील मेंढपाळांच्या मेंढ्यांना रोगाची लागण (Disease Outbreak In Sheep's) झाल्याने शेकडो मेंढ्यांचा मृत्यू (Sheep Died) झाला. त्याची तत्काळ दखल घेत जिल्ह्यातील ३० पशुवैद्यकीय डॉक्टरांचा चमू या ठिकाणी पोहोचला. त्यांनी प्रथमोपचार सुरू केले आहेत. या घटनेत मृत पावलेल्या मेंढ्यांची संख्या आता हजारांवर जाऊन पोहोचली आहे.

शनिवारी (ता. २०) सकाळी साडेसात वाजल्यापासून पशुवैद्यकीय अधिकाऱ्यांनी आजारी मेंढ्यांना प्रथम उपचार करून काही मेंढ्यांचे रक्तनमुने घेतले, तर मृत पावलेल्या मेंढ्यांचे शवविच्छेदन केले. मेंढ्यांच्या तोंडाला फोड येणे, अंगात ताप येणे, पायाला जखम होणे हा प्रकार संसर्गजन्य आहे.

अशा प्रकारचा आजार साधारणतः पावसाळ्यात ओला चारा खाल्ल्याने होतो. तर ब्लू टंग, पायरेकझिया, तोंडखुरी-पायखुरी किंवा प्लुरो न्यूमोनिया अशा चार आजारांत अशी लक्षणे दिसतात, असा डॉक्टरांचा प्राथमिक निष्कर्ष आहे. हा आजार एकदा उद्‍भवल्यास तीन दिवसांच्या तीन स्टेपमध्ये जनावरांचा मृत्यू होतो. म्हणून त्याकरिता रविवारपासून या ठिकाणी डॉक्टरांच्या उपस्थितीत शिबिर घेतले जाणार आहे.