शेतीसह दुग्ध व्यवसायाला ‘आरसीईपी’मधून वगळा ः शेट्टी

कोल्हापूर  : शेतीसह दुग्ध व्यवसायाचा समावेश प्रादेशिक व्यापक आर्थिक भागीदारी (आरसीईपी) योजनेत करत असताना देशातील शेतकरी आणि दुग्ध व्यवसाय उत्पादक भरडला जाण्याची शक्यता आहे. यामुळे भागीदारी योजनेमधून शेतीसह दुग्ध व्यवसायाला वगळण्यात यावे, अशी मागणी स्वाभिमानी शेतकरी संघटनेचे अध्यक्ष राजू शेट्टी यांनी केंद्रीय वाणिज्यमंत्री पीयूष गोयल यांच्याकडे केली. श्री शेट्टी म्हणाले, केंद्र सरकारकडून देशाची अर्थव्यवस्था मजबूत करण्यासाठी प्रादेशिक व्यापक आर्थिक भागीदारी योजनेची अंमलबजावणी करण्यात येत आहे. भारत सरकारने दुग्ध व्यवसायासंदर्भात न्यूझीलंड आणि ऑस्ट्रेलिया या देशांशी उपपदार्थाबाबत करार करण्याचा निर्णय घेतला आहे. सध्या राष्ट्रीय स्तरावर भारत हा दुग्ध व उपपदार्थ उत्पादनात आघाडीवर आहे. जर न्यूझीलंड आणि ऑस्ट्रेल्यामधून उपपदार्थ आयात होऊ लागले तर देशातील दुग्ध व्यवसाय कोलमडून जाईल. परिणामी, देशामध्ये जवळपास १० कोटी दुग्ध उत्पादक शेतकरी संकटात येऊन बेरोजगारी वाढण्याची शक्यता आहे. यामुळे दुग्ध व्यवसाय व शेती या बाबतीत धोरण ठरवीत असताना, देशातील सर्व शेतकरी संघटनांना विश्वासात घेऊन निर्णय व्हावा, अशी मागणीही शेट्टी यांनी केली. याबाबत बोलताना वाणिज्य मंत्री पीयूष गोयल म्हणाले, की या योजनेतून देशाची आर्थिक स्थिती मजबूत करण्याबरोबर रोजगार वाढवून महागाईवर नियंत्रण ठेवण्याचे सरकारचे प्रयत्न आहेत. दुग्ध उत्पादक शेतकऱ्यांचे हित लक्षात घेऊन दुग्ध व्यवसाय कोलमडून जाणार नाही, याची काळजी घेऊ. तसेच उपपदार्थ आयात धोरण ठरवत असताना देशातील डेअरी क्षेत्रातील दूध संस्थांना विश्वासात घेऊन निर्णय घेऊ, असे आश्वासन दिले.