सांगली जिल्ह्यात सव्वा लाख एकरांवर ठिबक सिंचन

सांगली : जिल्ह्यात ठिबक आणि तुषार सिंचन करण्यासाठी शेतकऱ्यांचा कल वाढू लागला आहे. गेल्या आठ वर्षांत ठिबक सिंचनाचे ४९ हजार ४९६ हेक्‍टर तर, तुषार सिंचन २ हजार ११५ हेक्‍टर असे एकूण ५१ हजार ६११ हेक्‍टर म्हणजे एक लाख २९ हजार २७ एकर क्षेत्र ठिबक व तुषार सिंचनाखाली आली आहे.

२०१७-१८ मध्ये ३ हजार १०० शेतकऱ्यांनी १६७० हेक्‍टरवर ठिबक सिंचन योजनेचा लाभ घेतला आहे. गेल्या आठ महिन्यांत जिल्ह्यात एकतीशसे शेतकऱ्यांना सुमारे सात कोटींचे अनुदान मिळाले आहे. जास्तीत-जास्त क्षेत्र सिंचनाखाली यावे यासाठी ठिबक आणि तुषार सिंचनाला शासन प्रोत्साहन देत आहे. त्यासाठी ४५ ते ५५ टक्केपर्यंत अनुदान शेतकऱ्यांना देण्यात येत आहे. त्यात ऊस आणि द्राक्षांचे सर्वाधिक क्षेत्र आहे.

दुसऱ्या बाजूला जिल्ह्याच्या पूर्वभागात द्राक्षे आणि डाळिंब बागायतदारांनी कमी पाण्यात पीक येण्यासाठी ठिबक सिंचनचा मार्ग स्वीकारला. गेल्या काही वर्षांत सिंचनाखाली क्षेत्र जास्तीत- जास्त आणण्याचा प्रयत्न सुरू आहे. साखर कारखान्यांची संख्या वाढल्यानंतर उसाचे क्षेत्र वाढण्यासाठी प्रोत्साहन देण्यात येत आहे. सुरवातीस उपसा सिंचन योजना सुरू झाल्या. मात्र अतिरिक्त पाणी वापरामुळे क्षारपड जमिनीची समस्या गंभीर झाली. त्यामुळे आता पाणी बचतीसाठी व जमीन वाचवण्यासाठी बहुसंख्य कारखाने ठिबकसाठी प्रोत्साहन देत आहेत.

जिल्ह्याच्या पूर्व भागात ताकारी, टेंभू आणि म्हैसाळ योजनांचे पाणी गेले आहे. मात्र ते  बारमाही मिळेल, याची खात्री शेतकऱ्यांना नाही. त्यामुळे तलावात, शेततळ्यात पाणी साठवले जाते. हे पाणी अनेक शेतकरी ठिबक पद्धतीने पिकांना देत आहेत. पूर्व भागात द्राक्षे, डाळिंब आणि भाजीपाला पिकांसाठी ठिबकचा वापर मोठ्या प्रमाणात वाढतो आहे.

जिल्ह्यात आता उसासाठीचे ठिबकचा वापर वाढत आहे. आतापर्यंत या पिकाखाली ठिबकचे क्षेत्र ४० हजार एकरावर गेले आहे.