सोलापुरात ‘स्वाभिमानी’ने केली वीज बिलांची होळी

सोलापूर : ‘कोरोना’च्या प्रादुर्भावामुळे राज्यात झालेल्या लॉकडाउनच्या काळात तीन महिन्यांत घरगुती वीज बिलांमध्ये मोठ्या प्रमाणात वाढ झालेली आहे. अव्वाच्या सव्वा दराने वीज आकारणी झाल्याने सर्वसामान्यांना वीज बिले दुप्पट, तिप्पट आलेली आहेत. यामुळे सर्वसामान्य नागरिक त्रस्त झाले आहेत. या अन्यायकारक बिलांबाबत महावितरणचा निषेध नोंदविण्यासाठी स्वाभिमानी शेतकरी संघटनेच्या वतीने सोमवारी (ता.१३) महावितरणच्या मुख्यालयासमोर वीज बिले जाळून त्यांची होळी करण्यात आली.

‘कोरोना’च्या काळात ग्राहकांना अव्वाच्या सव्वा वीजबिले देण्यात आली आहेत. राज्यभरात वीजबिलांचा मोठा गोंधळ उडाला आहे. त्यामुळे ‘स्वाभिमानी’चे नेते राजू शेट्टी व प्रा. एन.डी.पाटील यांनी वीज बिलांच्या विरोधात आंदोलनाचे आवाहन केले होते. त्याच अनुषंगाने संघटनेचे युवा जिल्हाध्यक्ष विजय रणदिवे यांच्या नेतृत्वात सोलापुरात वीजबिलांची होळी करण्यात आली. जुनी मिल कंपाऊंड परिसरातील महावितरणच्या प्रवेश द्वारासमोर घोषणाबाजी करीत वीज बिलांची होळी करून आंदोलकांनी महावितरणच्या विरोधात रोष व्यक्त केला.

त्यानंतर महावितरणच्या अधिकाऱ्यांना मागण्यांचे निवेदन देण्यात आले. आज फक्त वीजबिले जाळली, जर वीज बिले माफ केली नाही तर महावितरणचे कार्यालयही जाळू, असा इशाराही यावेळी ‘स्वाभिमानी’ने दिला. या आंदोलनात जिल्हाध्यक्ष महामुद पटेल, पप्पु पाटील, सचिन मस्के, मोहसीन बिराजदार, अश्विनी व्हटकर सहभागी झाले होते.