शेतीला व्यवसाय म्हणून पाहण्याची गरज : कृषी आयुक्त सुहास दिवसे

नगर  : प्रत्येक आपत्ती काहीतरी संधी घेऊन येते. त्याप्रमाणेच लॉकडाउन काळात शेतकऱ्यांनी डिजिटल मार्केटिंगचा वापर करावा. शहरातील छोट्या-मोठ्या नोकऱ्यांमागे न लागता, डिजिटल तंत्रज्ञान वापरून शेतीला व्यवसाय म्हणून पाहावे, असा सल्ला कृषी आयुक्त डॉ. सुहास दिवसे यांनी दिला.

महात्मा फुले कृषी विद्यापीठात ‘शेतीमालाच्या विपणनासाठी डिजिटल माध्यमांचा वापर’ या विषयावर एक आठवड्याच्या ऑनलाइन प्रशिक्षण शिबिराचे उद्घाटन करताना श्री.दिवसे बोलत होते. अध्यक्षस्थानी कुलगुरू डॉ. के. पी. विश्वनाथा, माजी विस्तार शिक्षण संचालक डॉ. किरण कोकाटे, संशोधन संचालक डॉ. शरद गडाख, सहनिमंत्रक डॉ. मुकुंद शिंदे उपस्थित होते.

डॉ. दिवसे म्हणाले, की तरुणांनी शेतीला व्यवसाय बनविताना, शेतीमाल पुरवठ्यात सातत्य, दर्जा व सुरक्षितता सांभाळली पाहिजे. या सर्व गोष्टींची काळजी घेऊन, शहरातील ग्राहकांची गरज लक्षात घेऊन, काळजीपूर्वक शेती व्यवसाय केला, तर पुढील दोन दशके शेतीची असतील.

कुलगुरू डॉ. विश्वनाथा म्हणाले, की आज शेतकऱ्यांवर ‘कोरोना’मुळे संकट आले आहे. या काळात शेतीमालाच्या विपणनासाठी डिजिटल माध्यमांचा वापर खूप फायदेशीर राहील.