खरिपाच्या पार्श्वभूमीवर शेतीकामे रखडणार नाहीत याची काळजी घ्या : कृषिमंत्री दादा भुसे

मुंबई  : राज्यातील शेतकरी खरीप हंगामाची तयारी करीत असताना पेरणीपूर्व कामे, खते, बियाण्यांची वाहतूक आणि विक्री व्यवस्था आदी शेतीशी निगडीत कामे लॉकडाउनच्या परिस्थितीत रखडणार नाहीत याची खबरदारी जिल्हा प्रशासनाने घ्यावी, असे निर्देश कृषिमंत्री दादा भुसे यांनी दिले आहेत.

याबाबत श्री. भुसे म्हणाले, की  खरीप हंगामासाठी कृषी विभागातील अधिकारी अणि कर्मचाऱ्यांची गरज लक्षात घेता कोरोना प्रतिबंधाच्या कामासाठी या विभागाच्या अधिकारी कर्मचाऱ्यांची सेवा घेऊ नये.

शेतमजुरांना कामासाठी ये-जा करणे सहजसुलभ व्हावे तसेच शेतीविषयक व्यवसायातील व्यक्ती आणि संबंधित विभागातील अधिकारीआणि कर्मचारी यांच्यासाठी कृषी विभागाने दिलेली प्रवेशपत्रे ग्राह्य धरण्यात यावीत. यासाठी जिल्हाधिकाऱ्यांनी पोलिस प्रशासनाला योग्य त्या सूचना द्याव्यात, असे निर्देश मुख्य सचिव अजोय मेहता यांनी दिले आहेत.