नांदेडमधील पीक नुकसानीची कृषिमंत्र्यांकडून पाहणी

नांदेड : नांदेड जिल्ह्यात मागील काही दिवसांपासून सतत पडणाऱ्या पावसामुळे सोयाबीन, कापूस, तूर, उडीद, मूग, ऊस या पिकांचे नुकसान झाले आहे. या पार्श्वभूमीवर कृषिमंत्री दादा भुसे यांनी रविवारी (ता.२७ ) नांदेड तालुक्यातील कासारखेडा व पासदगाव येथील नुकसानग्रस्त पिकांची पाहणी केली.

पासदगाव येथील गंगाधर शेषेराव जाधव यांच्या नुकसानग्रस्त सोयाबीन पिकाची पाहणी त्यांनी केली. यावेळी शेतकऱ्यांच्या समस्या देखील त्यांनी जाणून घेतल्या.

यावेळी खासदार हेमंत पाटील, आमदार बाळाजी कल्याणकर, विभागीय कृषी सहसंचालक तुकाराम जगताप, जिल्हाधिकारी डॉ. विपीन, जिल्हा अधीक्षक कृषी अधिकारी रविशंकर चलवदे, उपविभागीय कृषी अधिकारी रविकुमार सुखदेव, नांदेड तालुका कृषी अधिकारी सिद्धेश्वर मोकले, अर्धापूर तालुका कृषी अधिकारी अनिल शिरफुले उपस्थित होते. यावेळी श्री. भुसे यांना मालेगाव येथे शेतकऱ्यांनी भरपाईबाबत निवेदन दिले. यानंतर त्यांनी कासारखेडा व पासदगाव शिवारात भेट दिली. शेतकऱ्यांनी सरसकट पंचनामे करुन भरपाई द्यावी, अशी मागणी केली.