हिंगोली, परभणीतील पीक नुकसानीचे तत्काळ पंचनामे करा ः कृषिमंत्री दादा भुसे

हिंगोली  ः अतिवृष्टीमुळे नुकसान झालेल्या शेतकऱ्यांच्या पाठीशी शासन खंबीरपणे उभे आहे. बाधित शेतकऱ्यांना मदत देण्यासाठी सर्व संबंधित यंत्रणांनी हिंगोली आणि परभणी जिल्ह्यातील पीक नुकसानीच्या पंचनाम्याची कामे तत्काळ पूर्ण करावीत, असे आदेश कृषिमंत्री दादा भुसे यांनी दिले.

श्री. भुसे यांनी रविवारी (ता.२७) हिंगोली येथे आयोजित बैठकीमध्ये हिंगोली आणि परभणी जिल्ह्यातील पीक नुकसानीचा आढावा घेतला. त्यानंतर औंढा तालुक्यातील नुकसानीची पाहणीची केली. हिंगोली आणि परभणी जिल्ह्यात मागील काही दिवसांपासून सतत पडणाऱ्या पावसामुळे सोयाबीन, कापूस, तूर, उडीद, मूग, ऊस आदी सुमारे १ लाख हेक्टरवरील पिकांचे नुकसान झाल्याचा प्राथमिक अंदाज आहे.

येथील जिल्हाधिकारी कार्यालयाच्या डीपीसी सभागृहात हिंगोली व परभणी जिल्ह्यातील पाऊस, पीक परिस्थिती आणि कृषी योजना अंमलबजावणीबाबतचा आढावा श्री. भुसे यांनी घेतला. यावेळी जिल्हा परिषदेचे अध्यक्ष गणाजी बेले, खासदार हेमंत पाटील, आमदार तान्हाजी मुटकुळे, संतोष बांगर, राजू नवघरे, जिल्हाधिकारी रुचेश जयवंशी, जिल्हा परिषदेचे मुख्य कार्यकारी अधिकारी राधाबिनोद शर्मा, पोलीस अधीक्षक राकेश कलासागर, कृषी सहसंचालक तुकाराम जगताप, निवासी उपजिल्हाधिकारी अरुण संगेवार, हिंगोलीचे जिल्हा अधीक्षक कृषी अधिकारी विजय लोखंडे, परभणीचे जिल्हा अधीक्षक कृषी अधिकारी संतोष आळसे उपस्थित होते. 

त्यानंतर श्री. भुसे यांनी हिवरा जाटू, काठोडा तांडा, औंढा नागनाथ आदी गावांतील पीक नुकसानीची पाहणी केली. शेतकऱ्यांची संवाद साधत धीर दिला. मदतीचे आश्वासन दिले. शेतकऱ्यांच्या समस्या देखील जाणून घेतल्या. औंढा नागनाथ तालुक्यातील हिवरा जाटु येथील ग्यानदेव उघडे यांच्या शेतातील सोयाबीन नुकसानीची पाहणी श्री. भुसे यांनी केली. काठोडा तांडा येथील शेतकरी विठ्ठल बुचके यांच्या  शेतातील पिकाची पाहणी त्यांनी केली. विकेल ते पिकेल संकल्पने अंतर्गत औंढानागनाथ येथे भाजीपाला, फळे स्टॉलचे उद्घाटन श्री. भुसे यांनी केले.