पुणे बाजार समितीत १८ हजार क्विंटल शेतीमालाची आवक

पुणे  ः ‘कोरोना’च्या पार्श्वभूमीवर लॉकडाऊन सुरु आहे. या पार्श्वभूमीवर पुणे बाजार समितीमध्ये सोमवारी (ता.६) कांदा, बटाटा आणि फळांची लहान, मोठ्या ५५७ वाहनांमधून सुमारे १८ हजार ८०० क्विंटल आवक झाली. मोशी आणि खडकी उपबाजारात जास्त गर्दी झाल्याने सोशल डिस्टन्सिंग राखण्यासाठी बाजार बंद ठेवण्यात आला होता, अशी माहिती प्रशासक बी.जे.देशमुख यांनी दिली. 

लॉकडाऊनमध्ये शेतीमालास उठाव मिळण्याबरोबरच ग्राहकांना रास्त दरात शेतीमाल मिळावा, यासाठी गेल्या १० दिवसांपासून साप्ताहिक सुट्टी वगळता चक्राकार पद्धतीने बाजार आवार सुरु आहे. रविवारी (ता.५) भुसार बाजारात काही किरकोळ व्यापारी शेतीमाल विक्री करत असताना, सामाजिक अंतर राखत नसल्याचे निर्दशनास आल्यानंतर किरकोळ विक्री बंद करण्यात आली आहे. 

बाजार आवारात कर्तव्यावर कार्यरत असलेल्या सर्व कर्मचाऱ्यांना आता जागेवरच नाष्टा आणि पाणी देण्याची सुविधा मंगळवारपासून (ता.७) देण्यात येणार आहे, असे श्री. देशमुख यांनी सांगितले.