सोलापुरात पावसाने जूनची सरासरी केली पूर्ण

सोलापूर  ः जिल्ह्यात यंदा पावसाने चांगली सुरुवात केली आहे. गेल्या दोन वर्षांच्या तुलनेत यंदा पहिल्यांदाच जूनमध्ये पावसाने सर्वदूर हजेरी लावत या महिन्याची सरासरी ओलांडली आहे. जूनमध्ये सोलापूर जिल्ह्यात सरासरी १९८.६ मिमी पाऊस होतो. यावर्षी २००.९ मिमी पाऊस झाला आहे.

यंदाच्या पावसाळ्यात रोहिणी, मृग, आर्द्रा आणि पुनर्वसू नक्षत्रात पावसाने दमदार हजेरी लावल्याने जिल्ह्यात जूनच्या पावसाची सरासरी पूर्ण झाली आहे. जुलैमध्ये सोलापूर जिल्ह्यात १२६.७ सरासरी मिमी पाऊस होतो. जुलैमध्ये आतापर्यंत ७७.६ मिमी पाऊस झाला आहे. तसेच जुलैमध्ये होणाऱ्या एकूण सरासरी पावसाच्या ६१.२ टक्के पाऊस झाला आहे. सध्या सुरु असलेल्या पुनर्वसू नक्षत्रात आतापर्यंत चांगला पाऊस झाला आहे.

१९ जुलैला सूर्याचा पुष्य नक्षत्रात प्रवेश होत आहे. या नक्षत्राचे वाहन हत्ती आहे. हत्ती वाहन असल्याने मुसळधार पाऊस पडणार असल्याचा आजपर्यंतचा अनुभव आहे. गेल्या वर्षी पावसाने जुलैनंतर मोठी ओढ दिली होती. त्यामुळे जिल्ह्यातील शेतकऱ्यांचा खरीप वाया गेला होता. हवामान विभागाने यंदा चांगल्या पावसाचा अंदाज व्यक्त केला आहे. त्यानुसार या महिन्यातही दमदार पाऊस पडेल, अशी आशा शेतकऱ्यांना आहे.   खरीप पिकांना फायदा सोलापूर जिल्ह्याचा मुख्य हंगाम रब्बी असला, तरी खरिपातही मोठ्या प्रमाणात पिके घेतली जात आहेत. सोलापूर जिल्ह्याचा समावेश गेल्या वर्षीपासून खरीप हंगामात करण्यात आला आहे. कृषी विभागाने खरीप पेरणीसाठी यंदा २ लाख ३४ हजार हेक्टर इतके उद्दिष्ठ घेतले आहे. वेळेवर झालेल्या पावसामुळे जूनअखेर पहिल्याच महिन्यात पेरणीची टक्केवारी १०० टक्क्यांपुढे गेली आहे. तूर, सोयाबीन, मूग, सूर्यफूल, मका या प्रमुख पिकांचा त्यात समावेश आहे. या पावसाचा फायदा या पिकांना होणार आहे.