पूर्वहंगामी कपाशी लागवड करु नका ः पालकमंत्री बच्चू कडू

अकोला  ः आगामी हंगामात कपाशीवर गुलाबी बोंडअळीचा प्रादुर्भाव होवू नये, यासाठी कपाशीची पूर्व हंगामी लागवड करू नये, असे आवाहन पालकमंत्री बच्चू कडू यांनी केले आहे.

अकोला जिल्ह्यात या हंगामात १ लाख ६० हजार हेक्टर क्षेत्रावर कपाशी लागवडीचे उद्दिष्ट ठेवण्यात आले आहे. त्यापैकी ७० टक्के कोरडवाहू व ३० टक्के ओलित क्षेत्र आहे. शासनाने जिल्ह्यासाठी आठ लाख बियाणे पाकिटांचा पुरवठा केला आहे. त्यानुसार जिल्ह्यामध्ये खाजगी बियाणे उत्पादक कंपन्यांकडून १.६० हेक्टर क्षेत्रासाठी ८ लाख बियाणे पाकिटे वितरकांकडे पोहोच झाली आहेत. त्यामुळे कापूस बियाण्याचा मुबलक पुरवठा झाला आहे. केंद्र शासनाने कपाशी बियाण्याच्या किंमती ठरवून दिल्या असून बीजी-१ साठी ६३५ रुपये प्रतिपाकीट व बीजी-२ साठी ७३० रूपये प्रतिपाकीट असा दर आहे. जिल्ह्यात ६४० बियाणे विक्री परवानाधारक असून त्यांच्यामार्फत बियाणे उपलब्ध होणार आहे.

कापसावर गुलाबी बोंडअळीचा प्रादुर्भाव होऊ नये, यासाठी बोंड अळीचे जीवनचक्र खंडीत करणे हा एकमात्र चांगला यशस्वी उपाय आहे. २०१७-१८ मध्ये जिल्ह्यात मोठ्या प्रमाणावर गुलाबी बोंड अळीचा प्रादुर्भाव होवून कपाशी पिकाचे मोठ्या प्रमाणावर नुकसान झाले होते. त्यांची पुनरावृत्ती होवू नये यासाठी पूर्वहंगामी कपाशी लागवड करू नये, असे आवाहन श्री.कडू यांनी केले आहे.

मागील वर्षी २०१९-२० मध्ये ज्याप्रमाणे १ जूननंतर प्रत्यक्ष शेतकऱ्यांना कपाशी बियाण्यांची विक्री केली होती. त्याप्रमाणे यावर्षी केली जाईल. त्यामुळे शेतकऱ्यांनी बियाण्यासंदर्भात कोणतीही काळजी करू नये व हंगामपूर्व कपाशी लागवड करू नये, असे आवाहनही त्यांनी केले.