नगरमध्ये १८ हजार हेक्टरवर उडदाची पेरणी

नगर  ः नगर जिल्ह्यात यंदाच्या खरीप हंगामात उडदाचे क्षेत्र वाढण्याचा अंदाज आहे. आतापर्यंत सुमारे १७ हजार ७२७ हेक्टर क्षेत्रावर उडदाची पेरणी झाली असून ही सरासरीच्या तुलनेने अधिक आहे. जामखेड आणि कर्जत तालुक्यात यंदा उडदाचे क्षेत्र अधिक आहे, अशी माहिती कृषी विभागाच्या सूत्रांनी दिली. 

नगर जिल्ह्यात उडदाचे सरासरी क्षेत्र १७ हजार ५९६ हेक्टर आहे. यंदा सुरवातीला पेरणीयोग्य पाऊस झाल्याने मूग, उडीद, तुरीच्या पेरण्यांना वेग आला. उडदाची आतापर्यंत सरासरीच्या तुलनेत अधिक क्षेत्रावर पेरणी झाली आहे. मात्र संगमनेर, अकोले, राहाता, श्रीरामपूर, श्रींगोदा, राहुरीत उडदाचे क्षेत्र अल्प आहे. 

कर्जत, जामखेड तालुक्यात सर्वाधिक क्षेत्र आहे. गेल्या वर्षी ३२ हजार हेक्टरवर उडदाची पेरणी झाली होती. त्या तुलनेत यंदा अजून पेरणी क्षेत्र कमी असले तरी सुरवातीला लवकर झालेल्या पावसामुळे क्षेत्रात मोठी वाढ होण्याचा अंदाज कृषी विभागाने व्यक्त केला आहे. सध्या खरिपाची पेरणीही सरासरीच्या जवळ आली आहे. मात्र अजून वाफसा नसल्याने अनेक भागांत पेरणी थांबली आहे. दोन दिवसांपासून पावसाने काही प्रमाणात उसंत दिल्याने उर्वरित पेरण्यांना वेग येणार आहे. 

तालुकानिहाय उडीद पेरणीचे क्षेत्र (हेक्टर) : नगर ः ४१४, पारनेर ः ६२, श्रीगोंदा ः ४५, कर्जत ः ११,९०८, जामखेड ः ३५३६, शेवगाव ः २४०, पाथर्डी ः ११३८, नेवासा ः २८९, राहुरी ः ३९, संगमनेर १, अकोले ः ३, कोपरगाव ः ४०, श्रीरामपूर ः ४, राहाता ः ८.