नगर जिल्ह्यात ‘सारी’चे रुग्ण शोधण्याची मोहीम सुरु

नगर  ः श्वसन विकाराचा तीव्र त्रास होत असणाऱ्या (सारी) रुग्णांची ते रुग्णालयापर्यंत येण्याची वाट न पाहता विविध पथके स्थापन करून ग्रामीण आणि नागरी भागात सर्वेक्षण करून आजाराची लक्षणे असणाऱ्‍या रुग्णांना उपचारासाठी दाखल करण्याचे निर्देश जिल्हाधिकारी राहुल द्विवेदी यांनी दिले होते. त्यानुसार, जिल्ह्यात तालुकानिहाय विविध पथके स्थापन करण्यात आली असून घरोघरी जाऊन सर्वेक्षण केले जात आहे.

कोरोना विषाणू संसर्गाच्या प्रादुर्भावा बरोबरच जिल्ह्यात सारीचे रुग्ण आढळून येत असल्याने या रुग्णांना शोधून त्यांना रुग्णालयात दाखल करण्याचे नियोजन करण्यात आले होते. जिल्ह्यातील सर्व खाजगी वैद्यकीय व्यावसायिकांना त्यांच्या दवाखान्यात आलेल्या अशा रुग्णांना शासकीय रुग्णालयात पाठविण्याबाबत आदेशही जारी करण्यात आले होते. मात्र, या आजाराची लक्षणे असणारे रुग्ण रुग्णालयापर्यंत येईस्तोवर ते इतरांना प्रादुर्भाव करू शकतात, हे लक्षात घेऊन प्रशासनाने आता अशा रुग्णांची शोध मोहीम सुरु केली आहे.

संगमनेर मध्ये एकूण २२० पथके तयार केली गेली आहेत. त्यात सर्वेक्षणासाठी नगरपालिका क्षेत्रात २० आणि ग्रामीण भागात २०० पथके राहणार आहेत. ही पथके दररोज प्रत्येकी सुमारे ५० घरांना भेटी देऊन सर्वेक्षण करत आहेत. दररोज सुमारे ५५ ते ६० हजार लोकांचे सर्वेक्षण केले जात आहे. या पथकांवर निरीक्षणासाठीही वेगळे पथक कार्यान्वित करण्यात आले आहे. सारीची लक्षणे असणाऱ्या अशा रुग्णांवर उपचारासाठी संगमनेरमध्ये खास क्लिनिक तयार केले आहे. राहुरीमध्ये घरोघरी सर्वेक्षण सुरू केले आहे. तालुक्यात एकूण २१७ पथके कार्यरत आहेत. नगरपालिका क्षेत्रात १७ आणि ग्रामीण भागात २०० पथकांमार्फत सर्वेक्षण केले जात आहे.

मॅपिंगद्वारे हे पथक कुठे जाते आणि किती घरांना भेटी देते हे ऑनलाइन पद्धतीने पाहिले जात आहे. राहुरी मध्येही दररोज सुमारे ५० हजार लोकांचे सर्वेक्षण केले जात आहे. श्रीरामपूरमध्ये नगरपालिका क्षेत्रासाठी एक पथक तर ग्रामीण भागासाठी १७७ पथके कार्यरत आहेत. कर्जत ब्लॉकमध्ये ग्रामीण भागातील १९६ सर्वेक्षण पथके आणि शहरी भागात १९ पथके सारीवर नियंत्रण ठेवण्याचे काम करीत आहेत. त्यासाठी २६ पर्यवेक्षकांमार्फत पर्यवेक्षण केले जात आहे. पाथर्डी तालुक्यात ग्रामीण भागात १७५ आणि शहरी भागात १० पथके सारी आजाराबाबत सर्वेक्षण करीत आहेत, असे श्री. व्दिवेदी यांनी सांगितले.