आरोग्य क्षेत्रात काम करू इच्छिणाऱ्यांनी नाव नोंदणी करावी : मुख्यमंत्री उध्दव ठाकरे

मुंबई  :  कोरोना विरोधातील युद्धात सहभागी होऊन शासनाच्या बरोबरीने काम करू इच्छिणाऱ्या आणि आरोग्य सेवेत काम केलेले निवृत्त सैनिक, निवृत्त परिचारिका, वॉर्डबॉय, आरोग्य सेवेत प्रशिक्षण पूर्ण केलेले, परंतु ज्यांना जागा नाही म्हणून काम मिळाले नाही पण त्यांना काम करण्याची इच्छा आहे, अशा सर्वांनी पुढे येऊन आपले  नाव, पत्ता   covidyoddha@gmail.com   या ई-मेलवर नोंदवावा, असे आवाहन मुख्यमंत्री उद्धव ठाकरे यांनी केले.

समाज माध्यमाद्वारे बुधवारी (ता.८) जनतेशी साधलेल्या थेट संवादादरम्यान श्री. ठाकरे बोलत होते. ते म्हणाले, की सर्दी, पडसे आणि तापाचे लक्षणे असलेल्या रुग्णांची  तपासणी करून त्यांना त्यांच्या लक्षणाप्रमाणे पुढील उपचारासाठी स्वतंत्र रुग्णालयात दाखल करण्यात येत आहे. सौम्य लक्षणे, तीव्र लक्षणे आणि इतर तक्रारी, गंभीर आजार असलेल्या रुग्णांसाठी स्वतंत्र रुग्णालयांची व्यवस्था करण्यात आली आहे.

तीव्र लक्षणे, गंभीर आजार व इतर तक्रारी असणाऱ्या रुग्णांना तिसऱ्या रुग्णालयात दाखल करण्यात  येत असून ही रुग्णालये  ह्रदयविकार, किडनी, मधुमेह यासारख्या आजारांवर उपचार करण्यासाठी सुसज्ज आहेत. ‘कोरोना’च्या संकटानंतर एक नवीन आर्थिक संकट उभे राहणार आहे. त्याचा सामना करण्यासाठी तंदुरुस्ती आणि हिमतीची आवश्यकता आपल्या सगळ्यांना भासेल. त्यामुळे घरातच हलका व्यायाम करावा, असे त्यांनी सांगितले.   ‘रुग्णवाढीचा आलेख शून्यावर आणायचा आहे’ श्री. ठाकरे म्हणाले, की आपल्याकडे कोरोनाचे रुग्ण सापडून ४ आठवडे पूर्ण झाले. लॉकडाउनने गैरसोय होतेय हे खरे आहे. पण सोशल डिस्टन्सिंगसारखे दुसरे हत्यार आज आपल्याकडे नाही.  एवढे करूनही संख्या वाढते आहे. परंतु आपल्याला ही वाढच नको आहे. रुग्णांचा वाढता आलेख आपल्याला शून्यावर आणायचा आहे. त्यामुळे आपणच आपले संरक्षक आहोत, हे लक्षात ठेऊन प्रत्येकाने वागायचे आहे. यावेळी मुख्यमंत्र्यांनी रुग्णांची संख्या, चाचण्यांची संख्या याची माहिती देताना बरे होऊन घरी परतलेल्या ८० व्यक्ती आहेत, हे देखील आवर्जून सांगितले.