कऱ्हाडमध्ये `कोरोना’चे पाच रूग्ण वाढले

सातारा  : कऱ्हाड तालुक्यात कोरोनाची साखळी तुटत नसल्याचे चित्र आहे. शनिवारी अचानक कोरोनाबाधित रूग्णांची संख्या पाचने वाढली. हे सर्व रूग्ण कोरोना बाधित रूग्णांच्या निकटसहवासित असल्याने त्यांना कऱ्हाडातील उपजिल्हा रूग्णालयातील विलगीकरण कक्षात ठेवण्यात आले आहे.

सातारा जिल्ह्यात कोरोनाचा हॉटस्पॉट बनलेल्या कऱ्हाडात प्रतिबंधक उपाय कडक करूनही कोरोनाबाधित रूग्ण सापडण्याचे प्रमाण कमी होत नाही. शनिवारी अचानक कोरोनाचे पाच रूग्ण सापडले. गेल्या चार ते पाच दिवसांत कऱ्हाडात रूग्ण संख्या वाढत असल्याने जिल्हाधिकाऱ्यांनी कऱ्हाड, मलकापूर व परिघातील तीन किलोमीटरचा परिसर सील केला होता. आता सातारा जिल्ह्यात कोरोनाची रूग्ण संख्या २१ असून तिघेजण कोरोनामुक्त होऊन घरी गेले आहेत. दोघांचा मृत्यू झाला आहे. त्यामुळे कोरोनाचे एकुण २६ रूग्ण झाले आहेत. एकट्या कऱ्हाड तालुक्यात कोरोनाबाधित रूग्णांची संख्या १६ झाली आहे.

दरम्यान शुक्रवारी रात्री उशिरा क्रांतिसिंह नाना पाटील सर्वसाधारण रुग्णालयात २३ अनुमानितांना विलगीकरण कक्षात दाखल करण्यात आले आहे. या सर्वांच्या घशातील स्त्रावांचे नमुने बी. जे. वैद्यकीय महाविद्यालयात तपासणीसाठी पाठविण्यात आले आहेत, अशी माहिती जिल्हा शल्यचिकित्सक डॉ. आमोद गडीकर यांनी दिली आहे.