सांगलीतील ६७ हजार शेतकऱ्यांचा पीक विमा योजनेत सहभाग

सांगली  : जिल्ह्यातील ६७ हजार शेतकऱ्यांनी पंतप्रधान पीकविमा योजनेत सहभाग घेत पिके विमा संरक्षित केली आहेत. जिल्ह्यात पीकविमा भरण्यासाठी शुक्रवारी (ता.३१) अंतिम मुदत होती. त्यामुळे पीकविमा भरण्यासाठी शेतकऱ्यांनी बँकांमध्ये एकच गर्दी केली होती. ‘कोरोना’मुळे असलेले लॉकडाउन आणि कागदपत्रांची पूर्तता करण्यासाठी विलंब लागत असल्याने  विमा भरण्यासाठी मुदतवाढ द्यावी, अशी मागणी शेतकऱ्यांनी केली आहे.

जिल्ह्यात गेल्या आठवड्यात ‘कोरोना’च्या वाढत्या प्रादुर्भावामुळे लॉकडाउन जाहीर करण्यात आला होता. तसेच ग्रामीण भागात जनता कर्फ्यु लागू केला होता. परिणामी नागरिकांना महत्त्वाच्या कामांसाठीच घराबाहेर पडता येत होते. पीक विम्यासाठी कागदपत्रे जमा करण्याकरिता शेतकऱ्यांना संबंधित विभागांकडे हेलपाटे मारावे लागले.

गुरुवारी (ता. ३०) जिल्ह्यातील लॉकडाउन संपला. त्यानंतर शेतकरी पीक विमा भरण्यासाठी बाहेर पडू लागले. गेल्या दोन दिवसांत जिल्हा बँकेत विमा भरण्यासाठी शेतकऱ्यांची गर्दी होत होती. जिल्हा बॅंकेच्या मुख्य कार्यालयातील कर्मचाऱ्यास ‘कोरोना’चा संसर्ग झाल्याने बँकेच्या कामाचे नियोजन बदलण्यात आले आहेत.

गेल्यावर्षी खरीप हंगामात सुमारे १ लाख ३८ हजार शेतकऱ्यांनी पीकविमा भरला होता. यंदा खरीप हंगामात शुक्रवार अखेर ६७ हजार शेतकऱ्यांनी पीकविमा भरला असून एकूण ७७ ते ८० हजार शेतकरी या विम्यात सहभागी होतील असा अंदाज संबंधित विभागाच्या सूत्रांनी व्यक्त केला आहे. विमा भरण्यासाठी येणा़ऱ्या अडचणींमुळे शेतकरी त्रस्त झाला आहे. त्यामुळे विमा भरण्यासाठी मुदतवाढ  द्यावी, अशी मागणी शेतकऱ्यांनी केली आहे.  

प्रतिक्रिया पीक विमा भरण्यासाठी ‘कोराना’मुळे अनेक अडचणी आल्या आहेत. त्यामुळे पीक विमा भरण्यासाठी मुदत वाढवून द्यावी. तरच आम्हाला विमा भरता येईल. - पोपट माने, आरग, जि. सांगली.