अकोल्यात खरीप, रब्बीतील पिकांसाठी पीककर्ज वाटप दर निश्‍चित

अकोला  ः आगामी खरीप हंगामासाठी बँकांसाठी पीक कर्जदर जाहीर करण्यात आले आहेत. जिल्ह्यात बीटी कापूस लागवडीसाठी एकरी २१ हजार २०० तर हळदीसाठी सर्वाधिक ४२ हजार रुपयांचे कर्ज उपलब्ध करून देण्याचे नियोजन करण्यात आले आहे.

नवीन हंगामासाठी पीककर्ज वाटप सुरु झाले आहे. प्रशासनाने या हंगामासाठी बँकांना पीककर्ज वाटपासाठी सूचना केल्या आहेत. त्यात २०२०-२०२१ या हंगामासाठी हेक्टरी पीककर्ज वाटपाचा दर निश्‍चित करून देण्यात आला आहे. प्रामुख्याने जिल्ह्यात सोयाबीन, कापूस या दोन पिकांचे सर्वाधिक क्षेत्र असते. यानुसार बागायती बीटी कपाशी लागवडीसाठी हेक्टरी ५३ हजार रुपये म्हणजेच एकरी २१ हजार२०० रुपये दर राहील. सोयाबीन पिकाला हेक्टरी ४५ हजार मिळणार असून एकरी हा दर १८०० रुपये एवढा राहणार आहे. खरीप ज्वारीला हेक्टरी २६ हजार, तुरीला ३६ हजार ७००, भुईमुगाला ३८ हजार, सूर्यफुलासाठी २६ हजार २०० रुपये दर निश्‍चित करण्यात आला. कोरडवाहू बीटी कपाशीला हेक्टरी ४३ हजार, संकरित ज्वारीला २५ हजार, तूर पिकाला ३१,५००, सोयाबीनला ४५ हजार, बाजरीला २० हजार, मूग-उडदासाठी १९ हजार, तिळासाठी २३ हजार १००, ओवा पिकासाठी १७ हजार रुपये हेक्टरी पीककर्ज मिळेल.

बागायती पिकांमध्ये केळीला ९३ हजार ५००, मिरचीला ७५ हजार ३००, हळदीला एक लाख ५ हजार, आलेसाठी ९७ हजार, पपईकरिता ७० हजार, डाळिंबासाठी १ लाख २१ हजार, बटाट्यासाठी ७३ हजार रुपये कर्ज मिळू शकेल.

रब्बीतील पिकांसाठी असे आहेत दर खरिपासोबतच २०२०-२१ या वर्षात रब्बीतील पिकांसाठी पीककर्ज वाटपाचा दर निश्‍चित करण्यात आला. यात गव्हाला हेक्टरी ३५ हजार, बागायती हरभऱ्याला २९ हजार, कोरडवाहू हरभऱ्यासाठी २४ हजार, करडईसाठी २७ हजार, उन्हाळी भुईमुगासाठी ३८ हजार तर कांदा पिकाला हेक्टरी ७३ हजार रुपये मिळू शकणार आहेत.