निसर्ग चक्रीवादळामुळे पुणे जिल्ह्यात ७८७४ हेक्टरवर नुकसान 

पुणे  ः निसर्ग चक्रीवादळ आणि अति पावसाचा पुणे जिल्ह्यातील ३७१ गावांना फटका बसला आहे. यामुळे पिकांचे मोठे नुकसान झाले आहे. या पावसामुळे एकूण ७ हजार ८७४.४२ हेक्टर क्षेत्राचे ३३ टक्क्यांपेक्षा जास्त नुकसान झाले आहे. नुकसानीमुळे जिल्ह्यातील २८ हजार ४९६ शेतकऱ्यां‍ना आर्थिक फटका बसला असल्याचे नजर अंदाज अहवालावरून समोर आले आहे. 

जिल्हा अधीक्षक कृषी अधिकारी बाळासाहेब पलघडमल यांनी पुणे जिल्ह्यातील पिकांच्या नुकसानीबाबत नजर अंदाजाद्वारे माहिती घेतली. त्यावरून  ही माहिती पुढे आली आहे. नैसर्गिक आपत्तीमध्ये जिरायत क्षेत्रावरील पिकांचे नुकसान नसले तरी बागायती क्षेत्रातील ७८७४ हेक्टरवरील पिके आणि फळपिकांचे नुकसान झाले आहे. त्यासंदर्भात शासनाने तातडीने पंचनामे करण्याचे आदेश दिले आहेत. मात्र, जिल्ह्यात पंचनामे सुरू झालेले नाही. पंचनामे झाल्यास या नुकसानीची नेमकी माहिती समोर येईल. त्यानंतर पंचनाम्याचा अहवाल शासनाला सादर करून नुकसान भरपाई देण्यात येईल, अशी माहिती कृषी विभागाच्या सूत्रांनी दिली. 

जिल्ह्यात उन्हाळी पिके व भाजीपाल्याचे मोठे क्षेत्र आहे. त्यापैकी मावळ, मुळशी, भोर, वेल्हा, जुन्नर, आंबेगाव, खेड, शिरूर, दौंड, इंदापूर, बारामती, हवेली, पुरंदर तालुक्यातील अनेक भागांत कमी अधिक प्रमाणात नुकसान झाले आहे. मात्र, कृषी विभागाच्या नजर अंदाज अहवालामध्ये इंदापूर, जुन्नर, आंबेगाव,  खेड, मावळ, मुळशी, शिरूर या तालुक्यातील ३७१ गावांमध्ये पिकांचे नुकसान झाले असल्याचे समोर आले आहे.

यामध्ये उन्हाळी बाजरी, कांदा, मका, द्राक्षे, डाळिंब पिकांचे मोठ्या प्रमाणात नुकसान झाले. जिल्ह्यात सर्वाधिक नुकसान फळपिकांचे झाले आहे. सुमारे २९०६.१० हेक्टरवरील फळ पिकांना चक्रीवादळाचा तडाखा बसला आहे. त्यापाठोपाठ २६९२.७२ हेक्टरवरील भाजीपाला पिकांचे नुकसान झाले आहे. याशिवाय ५७२.५० हेक्टरवरील उन्हाळी बाजरीचे, ५७४.६५ हेक्टरवरील मका पिकाचे नुकसान झाले आहे.