परभणी जिल्ह्यात पुरामुळे पिके पाण्याखाली

परभणी  : जायकवाडी आणि माजलगाव धरणातील विसर्गामुळे गोदावरीस पूर आला आहे. यामुळे परभणी जिल्ह्यातील गोदावरी नदी काठाच्या गाव शिवारातील हजारो एकर क्षेत्रावरील पिके पाण्याखाली गेल्यामुळे शेतजमिनी जलमय झाल्या. यामुळे खरीप पिकांचे अपरिमित नुकसान झाले. 

जायकवाडी तसेच माजलगाव धरणातून सोडलेल्या पाण्यामुळे गोदावरीने धोक्याची पातळी ओलांडली. गंगाखेड, सोनपेठ, मानवत, पालम तालुक्यातील अनेक गावांतील शेतकऱ्यांच्या पिकांचे अतोनात नुकसान झाले आहे. अनेक गावांचा संपर्कही काही काळ तुटला होता. गंगाखेड येथील मंदिरे पाण्याखाली गेली आणि स्मशानभूमीलाही पाण्याचा वेढा पडला. अनेक शेतांमध्ये गोदावरीचे बॅकवॉटर शिरल्याने शेतांचे रूपांतर तळ्यांमध्ये झाले आहे.

या शेतांमधील पिके पूर्णतः पाण्याखाली गेल्याने शेतकऱ्यांचे मोठे नुकसान झाले आहे. काही शेतांमध्ये तर तराफ्यांवरून मासेमारी होत असतानाचे चित्र दिसून आले. गोदाकाठावरील नुकसानग्रस्त शेतकऱ्यांच्या कॉंग्रेसचे गंगाखेड तालुकाध्यक्ष गोविंद यादव, सुशांत चौधरी यांनी भेटी घेत शेतकऱ्यांना धीर दिला. यावेळी महात्मा फुले समता परिषदेचे माजी तालुकाध्यक्ष संजय सोनटक्के, प्रदीप चौधरी उपस्थित होते.

प्रतिक्रिया  पुराने हाती आलेली पिके हिरावून घेतली. शेतकऱ्यांचे मोठे नुकसान झाले असून शासनाने आर्थिक मदत द्यावी. - गोपाळ चौधरी, साबेर शेख, शेतकरी.    पूर ओसरल्यानंतर पीक नुकसानीचे तत्काळ पंचनामे करून तातडीने शेतकऱ्यांना अर्थसाहाय्य देण्यात यावे. - गोविंद यादव,तालुका अध्यक्ष,कॉंग्रेस, गंगाखेड.