फुलंब्री, भोकरदन तालुक्यात गारपीट; पिकांना फटका

औरंगाबाद/जालना : औरंगाबाद व जालना जिल्ह्यातील काही ठिकाणी रविवारी (ता. २९) वादळी वारे, गारांसह पाऊस झाला. या अवकाळी पावसाने पुन्हा एकदा फळपिकांसह उशिराने पेरणी झालेल्या रब्बी पिकांना दणका दिला आहे.  

जालना जिल्ह्यातील मंठा, वाटुर, घनसावंगी, बदनापूर, वालसावंगी, शहागड भोकरदन तालुक्यातील पिंपळगाव कोलते, सावखेडा, वजीरखेडा, पिंप्रीसह राजूर परिसरात रविवारी सायंकाळी पाऊस झाला. भोकरदन तालुक्यातील पिंपळगाव कोलते,  सावखेडा, वजीरखेडा, पिंप्रीसह राजूर परिसरात वादळी वारा, गारांसह जोरदार पाऊस झाल्याने पिकांचे मोठे नुकसान झाले. परिसरातील गहू, मका, बाजरी,आंबा मोहोरालाही फटका बसला. अचानक आलेल्या या पावसाने शेतकऱ्यांसह नागरिकांची धावपळ उडाली.

औरंगाबाद जिल्ह्यातील गंगापूर, पिंप्री, नेवरगाव, लोहगाव, जायकवाडी, पाचोड, ढोरकीन व टाकळी कोलते (ता.फुलंब्री) येथे  रविवारी सायंकाळी अवकाळी पाऊस झाला. टाकळी कोलते (ता.फुलंब्री) येथे जवळपास पाऊण तास गारांसह पाऊस पडल्याने गहू, मका, बाजरी, फळबागांचे मोठ्या प्रमाणात नुकसान झाले. शिवाय जोरदार वाऱ्यामुळे काही घरांवरील पत्रे उडाले.