कोल्हापूर जिल्ह्यात गारांसह पाऊस

कोल्हापूर  : शहर व जिल्ह्याच्या पश्‍चिम भागाला शुक्रवारी (ता.१०) सायंकाळी जोरदार पावसाने झोडपून काढले. कोल्हापूर शहरासह गारगोटी, चंदगड, राधानगरी परिसरात सुमारे अर्धा तास पाऊस झाला. अनेक ठिकाणी गारांसह पाऊस झाला. भुदरगड तालुक्‍यातील गारगोटी, खानापूर, म्हसवे परिसरातील रस्त्यांवर गारांचा खच पडला होता. 

बहुतांशी ठिकाणी दुपारी तीन ते चार वाजेदरम्यान पाऊस झाला. अनेक ठिकाणी सोसाट्याचा वाऱ्यासह पाऊस आल्याने काढणीस आलेल्या पिकांचे नुकसान झाले. भुदरगड तालुक्‍यातील सुर्यफुल, भुईमुग पिकांचे यापावसाने नुकसान होणार असल्याचे शेतकऱ्यांनी सांगितले. चार दिवसांपासून जिल्ह्यातील विविध भागात पाऊस सुरु आहे. सध्या रब्बी हंगामातील पिकांची काढणी सुरु आहे. दिवसभर ऊन असल्याने शेतकऱ्यांनी शाळू, गव्हाच्या मळणीस प्राधान्य दिले आहे. दुपारनंतर अचानक आलेल्या पावसाने या कामात अडथळे निर्माण होत आहेत.