नगर जिल्ह्यात पावसाचा कहर सुरुच

नगर ः जिल्ह्यात गेल्या चार दिवसांपासून अवकाळी पावसाचा कहर सुरुच आहे. रविवारी (ता.२९) सायंकाळी नगर, राहुरी, पाथर्डी, नेवासा भागात जोरदार वादळी पाऊस झाला. या पावसाने मोठे नुकसान होत आहे. पाथर्डी तालुक्यातील चिचोंडी, धारवाडी परिसरात अनेक घरांवरील पत्रे उडून गेल्याने त्यांचे नुकसान झाले.

नगर, पारनेर, राहुरी, नेवासा, पाथर्डी, श्रीगोंदा, शेवगाव या तालुक्यांत गेल्या चार दिवसांपासून अवकाळी पाऊस पडत आहे. आधीच कोरोना विषाणूच्या पार्श्वभूमीवर बाजार समित्या, आठवडे बाजार बंद असल्याने भाजीपाला, फळे, धान्य विक्री करण्याला अडचणी निर्माण झालेल्या असताना चार दिवसांपासून अवकाळी पावसाचे संकट उभे राहिल्याने शेतकरी हतबल झाले आहेत. काढणीला आलेला व काढणी केलेला गहू, कांदा, चारा पिके, फळे, द्राक्ष, उन्हाळी बाजरी यांचे मोठ्या प्रमाणात नुकसान पावसामुळे होत आहे.

रविवारी सायंकाळी झालेल्या वादळी पावसाने धारवाडी (ता. पाथर्डी) येथील गिते वस्तीवरील सचीन गिते, जालिंदर गिते, बाबासाहेब सोनवणे, मनोज आव्हाड, जनाबाई काळापहाड, नवनाथ रणसिंग, विनायक गोरे, महादेव रणसिंग, नारायण रणसिंग, नवनाथ रणसिंग, राहुल गंडाळ यांच्यासह अन्य शेतकऱ्यांच्या घरावरील पत्रे वादळी वाऱ्यामुळे उडून गेल्याने मोठे नुकसान झाले आहे. प्रशासनाने तातडीने नुकसानीचे पंचनामे करुन या शेतकरी कुटूंबांना आर्थिक मदत द्यावी, अशी मागणी पंचायत समिती सदस्य एकनाथ आटकर, उपसरपंच उद्धव काळापहाड यांनी केली आहे. जिल्हाभरात अवकाळी पावसाने आतापर्यंत तीन बळी गेले आहेत.