खरिपासाठी हेक्‍टरी २५ हजारांचे बिनव्याजी कर्ज देण्याची मागणी

नगर   ः शेतकऱ्यांना खरीप हंगामात पेरणीसाठी प्रति हेक्टर २५ हजार रूपयांचे बिनव्याजी कर्ज द्यावे, तसेच कोरोनाचा धोका लक्षात घेऊन बियाणे व खते कृषी विभागाच्या माध्यमातून थेट बांधावर उपलब्ध करून द्यावीत, अशी मागणी पद्मश्री डॉ. विठ्ठलराव विखे पाटील कृषी परिषदेच्या पदाधिकाऱ्यांनी मुख्यमंत्री उद्धव ठाकरे यांच्याकडे केली आहे.

कृषी परिषदेचे प्रदेशाध्यक्ष अध्यक्ष संजय दळे पाटील, कार्याध्यक्ष भागवत देवसरकर यांनी दिलेल्या निवेदनात म्हटले आहे, की अतिवृष्टीमुळे मागीलवर्षी खरीप आणि रब्बी अशा दोन्ही हंगामात शेतकऱ्यांच्या पिकांचे अतोनात नुकसान झाले आहे. रब्बी हंगामात जिल्ह्यात पीकविमा भरून घेण्यासाठी कंपनी पुढे न आल्याने विमा मिळण्याचीही शक्यता नाही. राज्य शासनाने या बाबींचा विचार करून शेतकऱ्यांना विनाअट बिनव्याजी हेक्टरी २५ हजार रुपयांचे कर्ज बँकेमार्फत तत्काळ उपलब्ध करून द्यावे.

तसेच खते, बियाणांची विक्री सुरु झाल्यानंतर दरवर्षीचा अनुभव पाहता कृषी केंद्रांवर शेतकऱ्यांची मोठी गर्दी होऊ शकते, गर्दीमुळे शेतकऱ्यांना कोरोनाचा प्रादुर्भाव होण्याचा धोका संभवतो. हे सर्व टाळण्यासाठी शेतकऱ्यांना थेट बांधावर कृषी विभागाच्या माध्यमातून खते, बियाणे उपलब्ध करून द्यावे. खरीप हंगामाच्या पेरणीला अजून १ महिन्यापेक्षा अधिक कालावधी शिल्लक आहे. यासाठी वेळीच योग्य पावले उचलून शेतकऱ्यांना दिलासा द्यावा, अशी मागणीही यावेळी श्री. देवसरकर यांनी केली आहे.