एफआरपी थकविणाऱ्या कारखान्यांवर कारवाईची मागणी

कऱ्हाड, जि. सातारा  : जिल्ह्यातील एफआरपी थकविणाऱ्या साखर कारखान्यांवर आरआरसीची कारवाई करावी, अशा मागणीचे निवेदन बळिराजा शेतकरी संघटनेने साखर आयुक्तांना प्रांताधिकाऱ्यांमार्फत दिले.

२०१९-२० मधील ऊस हंगामाची सांगता झाली आहे. काही कारखाने बंद होण्याच्या मार्गावर आहेत. ‘कोरोना’सारख्या संकटावर मात करण्यासाठी प्रशासन कामाला लागले आहे. सध्या शेतकऱ्यांच्या शेतीमालाला भाव नाही. त्यामुळे भाजीपाला शेतातच कुजून पडला आहे. काही शेतकऱ्यांनी तर बाजारपेठ उपलब्ध नसल्यामुळे शेतीमाल रस्त्यातच टाकून दिला आहे. जिल्ह्यातील अपवाद सोडला तर एकाही कारखान्याने पूर्ण एफआरपी दिलेली नाही. सर्व उद्योग बंद पडले असताना शेती उद्योग सुरू आहे. शेतकऱ्यांना खते, बियाणे, मशागतीसाठी पैशांची गरज असताना अद्यापही कारखान्यांनी एफआरपी पूर्ण केली नाही. ‘कोरोना’च्या पार्श्वभूमीवर शेतकऱ्यांना अडचणींना सामोरे जावे लागत आहे.