शासनाने मका, गव्हाची हमीभावानुसार खरेदी करण्याची मागणी

बाजारात गहू, मक्‍याला हमीभाव मिळत नाही. दुसरीकडे ग्राहकांना अवाजवी दरात धान्याची विक्री सुरू आहे. लॉकडाउनचा गैरफायदा घेतला जात आहे. याकडे प्रशासनाने लक्ष दिले पाहिजे. - दादाराव पाटील, शेतकरी, पाचोरा, जि.जळगाव.
संग्रहित छायाचित्र
संग्रहित छायाचित्र

जळगाव   ः कोरोनाचा संसर्ग आणि लॉकडाउनचे कारण सांगून बाजार समित्या, खासगी बाजारात अन्नधान्याची शेतकऱ्यांकडून कवडीमोल दरात खरेदी केली जात आहे. शासनाने मका व गव्हाची हमीभावानुसार खरेदी करावी, अशी मागणी शेतकरी करीत आहेत.

खानदेशात गहू, मक्‍याची लागवड मोठ्या प्रमाणात झाली होती. ही लागवड तापी, गिरणा, गोमाई, वाघूर, सुसरी आदी नद्यांच्या लाभक्षेत्रात अधिकची होती. रब्बीचे क्षेत्र अपेक्षेपेक्षा अधिक होते. जळगाव जिल्ह्यात तर २०० टक्‍क्‍यांवर रब्बी पोचला. अर्थातच उत्पादनही बऱ्यापैकी येत आहे. मका, गहू ही प्रमुख रब्बी पिके आहेत. मक्‍याची सुमारे ३५ ते ४० हजार हेक्‍टरवर तर गव्हाचीदेखील सुमारे ४० हजार हेक्‍टरमध्ये पेरणी झाली होती.

परंतु ‘कोरोना’च्या पार्श्वभूमीवर बाजार समित्यांचे कामकाज विस्कळीत झाले आहे. शेतकऱ्यांची अडवणूक सुरू आहे. ही अडवणूक सुरूच राहिली तर शेतकऱ्यांचे नुकसान वाढत जाईल. शेतकऱ्यांच्या अडचणींबाबत प्रशासन काम करीत नसल्याची स्थिती आहे. अन्नधान्याची विक्री अधिक दरात व्यापारी, खरेदीदार करीत आहेत. दुसरीकडे शेतकऱ्यांना हमीभावही मिळत नाही. यामुळे ग्राहक व शेतकऱ्यांचे नुकसान होत आहे. ही लुटालूट बंद व्हावी.

लॉकडाउनमध्ये कामगार, मध्यमवर्गीय अडचणीत आहेत. याचा गैरफायदा जे व्यापारी, मध्यस्थ घेत आहेत, त्यांच्यावर लक्ष ठेवावे. मक्‍याचे दर १२०० ते १४०० रुपये क्विंटलपर्यंत आहेत. गव्हाची खरेदीदेखील १६०० ते १८०० रुपये क्विंटल या दरात सुरू आहे. काही शेतकऱ्यांनी मका, गव्हाची घरी साठवणूक केली आहे. परंतु पुढे खरिपासाठी निधी लागणार आहे. त्यामुळे धान्याची विक्री बाजारात करावी लागेल. या स्थितीत शासनाने हमीभावात गहू, मक्‍याची खरेदी सुरू करावी, अशी मागणी शेतकरी करीत आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com