नागपूर जिल्ह्यात सोयाबीन बियाणे उगवणशक्ती तपासण्याचे प्रात्यक्षिक

नागपूर   ः गेल्या वर्षीच्या हंगामात पावसामुळे सोयाबीन उत्पादकांचे सर्वाधिक नुकसान झाले. त्या पार्श्‍वभूमीवर येत्या हंगामात घरचेच सोयाबीन बियाणे वापरण्याचे आवाहन कृषी विभागाकडून केले जात आहे. त्याकरिता कृषी विभागाकडून नागपूरमध्ये गावोगावी बियाणे उगवणशक्‍ती तपासण्याचे प्रात्याक्षिकही दाखविण्यात येत आहे.

नागपूर विभागात गेल्यावेळी ऐन काढणीच्यावेळी पावसाने हजेरी लावली होती. त्यामुळे सोयाबीनचे नुकसान झाले. परिणामी यावेळी बाजारातील सोयाबीन बियाण्याच्या दर्जाविषयी साशंकता व्यक्‍त केली जात आहे. सोयाबीनमध्ये ३३ टक्‍के बियाणे बदलाची शिफारस आहे. त्यामुळे बहुतांश शेतकरी घरचेच बियाणे वापरतील. या पार्श्‍वभूमीवर कृषी विभागाने गावोगावी जात कृषी सहायकांच्या माध्यमातून बियाण्यांची उगवणशक्‍ती तपासण्यासंदर्भाने जागृतीचे काम हाती घेतले आहे. नागपूरमध्ये जिल्हा अधीक्षक कृषी अधिकारी मिलिंद शेंडे यांच्या मार्गदर्शनात या कामाला गती देण्यात आली आहे.