रत्नागिरी जिल्ह्यात हळव्या भात कापणीत पावसाचा अडथळा

रत्नागिरी  : हळवे भात पीक कापणी योग्य झाले आहे; मात्र पावसाची उघडीप मिळत नसल्याने शेतकरी अडचणीत आले आहेत. कधी दिवसा तर कधी रात्री पावसाची मोठी सर पडत असल्यामुळे तयार झालेले भात पीक कापण्याचे धाडस शेतकरी करीत नाही. त्यामुळे जिल्ह्यात अनेक ठिकाणी उभे भात पीक पावसाने आडवी झाले आहे. जिल्ह्यात सुमार १५ हजार हेक्टरवर हळवी जातीच्या भाताची लागवड झाली असून त्याच्या कापणीवर पावसाचे सावट आहे.

रविवारी (ता. २७) सकाळी ८.३० वाजेपर्यंतच्या २४ तासात मंडणगडमध्ये ३.८०, दापोलीमध्ये ९.००, खेडमध्ये ७.३०, गुहागरमध्ये १४.३०, चिपळूणमध्ये ८.२०, संगमेश्‍वरमध्ये १७.७०, रत्नागिरीमध्ये १९.६०, लांजात १३.००, राजापुरात ५.६० मिमी पाऊस झाला. सप्टेंबर महिन्याच्या सुरुवातीपासून जिल्ह्यात सरी बरसत आहे.

सुरवातीपासूनच ही परिस्थिती असल्यामुळे शेतकरी अडचणीत आले आहेत. जिल्ह्यात सुमारे २० हजार हेक्टरवर हळव्या जातीच्या भाताची लागवड केली जाते. त्यातील १५ हजार हेक्टरवरील भात पीक कापणी योग्य झाले आहेत. या परिस्थितीत सतत पाऊस पडत राहिल्यामुळे कापणी रखडली आहे. गेले पंधरा दिवस कधी सकाळी तर कधी रात्री पावसाच्या मोठ्या सरी कोसळत आहे. दुपारी दोन ते तीन तासांसाठी पाऊस विश्रांती घेतो; मात्र भात कापणीसाठी तेवढा कालावधी पुरेसा नाही.

सलग दोन दिवस पावसाने विश्रांती घेतली तर कापलेलं भात सुकवून सुरक्षित ठिकाणी नेणे शक्य होते. पण तशी परिस्थिती नाही. लांजा तालुक्यातील भांबेड येथे सुमारे एक हेक्टरवरील भात पीक आडवे झाल्याने नुकसान झाले आहे. उर्वरित आठ तालुक्यांमध्ये अशीच परिस्थिती आहे. प्रतिक्रिया पाऊस थांबला नाही तर तयार झालेले भात पीक पडून नुकसान होईल. हळव्या जातीच्या भाताला लोंबी आली आहे. तयार झालेले भात पीक मळ्यातच पडून राहिले तर उगवून येईल. - संतोष भडवळकर, राजवाडी, संगमेश्‍वर, जि. रत्नागिरी.