माळेगाव कारखान्यात सत्तापरिवर्तन; राष्ट्रवादीची बाजी

माळेगाव, जि. पुणे  ः राज्यात लक्षवेधी ठरलेल्या बारामतीमधील माळेगाव साखर कारखान्याच्या निवडणुकीत राष्ट्रवादी पुरस्कृत नीलकंठेश्वर पॅनेलने बाजी मारली आणि सत्तापरिवर्तन झाले.

उपमुख्यमंत्री अजित पवार यांच्या दृष्टीने प्रतिष्ठेच्या समजल्या जाणाऱ्या या निवडणुकीत राष्ट्रवादीने मुसंडी मारत यश खेचून आणले. ज्येष्ठ नेते चंद्रराव तावरे, बाळासाहेब तावरे, रंजन तावरे, सुरेश खलाटे, तानाजी कोकरे, संगीता कोकरे हे विद्यमान संचालक पुन्हा निवडून आले. विशेषतः पवार यांनी मावळते सत्ताधारी चंद्रराव तावरे व रंजन तावरे यांना शह देत माळेगावचा गड जिंकला. 

माळेगावच्या पंचवार्षिक निवडणुकीच्या पार्श्वभूमीवर सोमवारी (ता.२४) ९ वाजता सुरू झालेली मतमोजणी प्रक्रिया मंगळवारी (ता. २५) दुपारी संपली. २१ जागांपैकी १७ जागांवर विजय मिळवित राष्ट्रवादी पुरस्कृत निळकंठेश्वर पॅनेलने यश संपादन केले, तर ४ जागा जिंकत चंद्रराव तावरे, रंजन तावरे यांनी सहकार बचाव पॅनेलच्या माध्यमातून कडवी झंुज दिली. सांगवी या गटामध्ये राष्ट्रवादीच्या वतीने पुन्हा मतमोजणी घेण्यात आली होती. उमेदवार रणजित खलाटे विरुद्ध राष्ट्रवादीचे अनिल तावरे यांच्या मतांमध्ये एक अंकी फरक होता. त्यामुळे तावरे यांच्या मागणीनुसार घेतलेल्या फेर मतमोजणीत त्यांचा २० मतांनी विजय झाला. अर्थात हा अनपेक्षित धक्का सहकार बचाव पॅनेलला मानला जातो. 

दरम्यान, अर्थसंकल्पी अधिवेशनामुळे व्यस्त असतानाही अजित पवार यांनी वेळ देत माळेगावसाठी मोर्चेबांधणी केली होती. नवीन चेहऱ्यांबरोबर बंडखोर माजी संचालकांना बरोबर घेत अजित पवार यांनी चंद्रराव तावरे व रंजन तावरे यांना सत्तेपासून दूर ठेवले. तसेच कार्यक्षेत्रात चार सभा घेत श्री. पवार यांनी सांगवी गटाच्या बालेकिल्ल्यात चंद्रराव तावरे यांना खिंडार पाडण्यासाठी उद्योजक नितीन जगताप यांच्या माध्यमातून पक्षाची चौथी उमेदवारी दिली होती. जगताप यांनी पक्षाचे प्रामाणिक काम केले, परंतु त्यांना स्वतः निवडून येता आले नाही.