...म्हणून सहा एकरांवरील द्राक्षबागेवर चालवली कुऱ्हाड

नाशिक  : निफाड तालुक्यातील सोनेवाडी येथे बाबूराव सानप यांची २५ एकर शेती आहे. १८ एकरांवर द्राक्ष बाग, तर उर्वरित क्षेत्रावर उसाचे पीक आहे. मागील काही वर्षांपासून नैसर्गिक आपत्तीमुळे झालेले नुकसान, लाखो रुपयांचा केलेला खर्च, व्यापाऱ्यांकडून झालेली फसवणूक, रोगांच्या प्रादुर्भावामुळे बाधित झालेली द्राक्ष बाग अशी संकटांची मालिका सुरूच आहे. या समस्यांना कंटाळून अखेर  सहा एकरांवरील द्राक्ष बागेवर कुऱ्हाड चालविण्याची दुर्दैवी वेळ द्राक्ष उत्पादक बाबूराव सानप यांच्यावर आली आहे. 

मागील काही वर्षांत प्रामुख्याने २०१३, २०१४ मध्ये सलग दोन वर्षे गारपीट झाल्याने हातातोंडाशी आलेले द्राक्ष पीक वाया गेले. पुढे यातून ते सावरले. भांडवल उभे केले अन् गुणवत्तापूर्ण द्राक्ष पिकवले. विक्रीही झाली मात्र व्यापाऱ्याने २०१५ मध्ये ११ लाखांची फसवणूक केली.

मोठ्या आर्थिक तणावात हातात भांडवल नसताना पुन्हा शेती उभी करण्यासाठी ३० लाखांचे पीककर्ज घेऊन शेती उभी केली. पुन्हा एकदा नैसर्गिक आपत्तीचा सामना करताना द्राक्ष बागा जिवंत ठेवल्या मात्र अतिवृष्टीच्या तडाख्यात बागा बुरशीजन्य रोगाच्या भक्ष्यस्थानी सापडल्या. अखेर नाइलाजाने बाग तोडण्याची नामुष्की श्री. सानप यांच्यावर आली आहे.

सहा वर्षांपूर्वी ६ एकर क्षेत्रावर सानप यांनी द्राक्ष लागवड केली होती. चालू वर्षी या क्षेत्रावर १२ सप्टेंबरच्या दरम्यान गोडी छाटणी घेतली. वेलींना चांगल्या प्रमाणावर घडधारणा झाली होती. मात्र नोव्हेंबरच्या सुरुवातीस झालेल्या पावसाच्या तडाख्यात बाग सापडल्याने मोठ्या प्रमाणावर घडकूज झाली. प्रतिकूल हवामानामुळे डाउनीचा मोठा प्रादुर्भाव द्राक्ष पिकावर झाला. सप्टेबर ते नोव्हेंबर या ३ महिन्यांच्या कालावधीत मजुरी, खते व कीटकनाशकांसाठी ९ लाख रुपये खर्च झाले. मात्र खर्च व मेहनत घेऊनही उत्पादन निघणार नसल्याने त्यांनी  बागेवर कुऱ्हाड चालविली.