निघोजच्या शेतकऱ्याकडून थेट ग्राहकांना भाजीपाला विक्री

नगर  ः कोरोना विषाणू संसर्गाच्या पार्श्वभूमीवर बाजार बंद झाल्यानंतर घरी येऊन व्यापाऱ्यांनी १५ रुपये किलोने खरेदी केलेले बटाटे गावांत नेऊन ४० रुपये किलोने विकायचे. ही बाब लक्षात येताच निघोज (ता. पारनेर) येथील नाना प्रभू वराळ या शेतकऱ्यांने व्यापाऱ्याऐवजी स्वतःच वाहनातून गाव, वाडी वस्तीवर भाजीपाला विक्री केली. सात दिवसांत ३५ हजार रुपयांचा भाजीपाला थेट ग्राहकांना विकला आणि ग्राहकांचा फायदा पाहताना नफाही मिळवला.

कोरोना विषाणूचा प्रादुर्भाव रोखण्यासाठी गेल्या आठ दिवसांपासून लाॅकडाऊन केले आहे. त्यामुळे बाजार समितीत भाजीपाला विक्री बंद असून वाहने बंद असल्याने वाहतूकही करता येत नाही. त्यामुळे शेतकरी हतबल झाले आहेत. भाजीपाल्याचे नुकसान होत आहे. गरजेनुसार व्यापारी थेट शेतकऱ्यांच्या बांधावर जात शेतीमाल खरेदी करत असताना दर मात्र पडले आहेत. निघोज येथील नाना प्रभू वराळ यांची सात एकर शेती आहे. त्यात त्यांनी गवार, दुधी भोपळा, डांगर भोपळा, बटाटे, बीट, कोथिंबीर, मेथी, शेपू, पालक ही पिके घेतली आहे.

लॉकडाऊन झाल्याने भाजीपाल्याची विक्री कशी करायची हा प्रश्न त्यांच्यासमोर निर्माण झाला. व्यापाऱ्यांनी शेतात पंधरा रुपये किलोने खरेदी केलेले बटाटे गावांत नेऊन चाळीस रुपये किलोने विकले. हाच धागा पकडून वराळ यांनी स्वतः वाहनातून उत्पादित केलेला भाजीपाला निघोजसह परिसरातील गाव, खेड्यात, वस्तीवर जाऊन ग्राहकांना विक्री केला. त्यांनी बटाट्याची वीस रुपये किलो, कोंथिंबीरीची जुडी दहा रुपये, कांदयाची पंधरा रुपये किलो, बीटाची दहा रुपये किलो दराने विक्री केली. त्यातून त्यांनी आठ दिवसात दिड टन बटाट्यासह इतर भाजीपाला विक्रीतून ३५ ते ४० हजार रुपये मिळाले. भाजीपाला विक्री थेट ग्राहकांनाच सुरूच ठेवणार असल्याचे त्यांनी सांगितले.