दहा वर्षांत सातारा जिल्ह्यातील १३८० शेतकरी कुटुंबांना विमाकवच

संग्रहित छायाचित्र
संग्रहित छायाचित्र

सातारा  ः जिल्ह्यात गोपीनाथ मुंडे शेतकरी अपघात विमा योजनेतंर्गत गेल्या दहा वर्षांत एक हजार ३८० मदतीचे प्रस्ताव मंजूर झाले. २२९ प्रस्ताव नामंजूर झाले असले, तरी त्यातील ३१ प्रस्ताव मंजुरीस पात्र आहेत. त्यातील १४ प्रस्ताव न्यायालयीन प्रक्रियेत आहेत, अशी माहिती कृषी अधीक्षक कार्यालयाच्या सूत्रांनी दिली.

शेती करताना विविध प्रकारचे अपघात होण्याची शक्‍यता असते. वीज पडणे, पूर, सर्पदंश, विंचूदंश, विजेचा शॉक बसणे आदी आपत्तींमुळे शेतकऱ्यांचा मृत्यू होतो. शिवाय नैसर्गिक आपत्तीसह रस्त्यांवरील अपघातांमुळेही मृत्यू ओढावतो. अशावेळी कुटुंबातील कर्त्या व्यक्तीचा मृत्यू झाल्यास किंवा अपंगत्व ओढवल्यास कुटुंबाचे उत्पन्नाचे साधन बंद होऊन अडचणी निर्माण होतात. अशा अपघातग्रस्त शेतकऱ्यास किंवा त्यांच्या कुटुंबास आर्थिक लाभ मिळावा म्हणून राज्य शासनाने शेतकरी अपघात विमा योजना सुरू केली. दुर्दैवाने अपघाती मृत्यू झाल्यास योजनेच्या निकषानुसार शासनाने नियुक्त केलेली विमा कंपनी दोन लाख रुपये व अपंगत्व आल्यास एक ते दोन लाख रुपयांच्या मर्यादेत शेतकऱ्यास किंवा त्याच्या कुटुंबास नुकसानभरपाई देते. 

शेतकऱ्याचे कुटुंब विमा निकषांमध्ये येत नसल्यामुळे त्याच्या कुटुंबातील एखाद्या व्यक्तीचा अपघात झाल्यास विमा संरक्षण मिळत नव्हते. त्यामुळे राज्य शासनाने या योजनेची व्याप्ती वाढविली आहे. सातबारा उताऱ्यावर नाव असलेल्या शेतकऱ्यासह त्याच्या कुटुंबातील वहितीधारक म्हणून नोंद नसलेल्या कोणत्याही एका सदस्यालादेखील आता या योजनेचा लाभ लाभ मिळणार आहे. संबंधित शेतकऱ्याचे आई-वडील, पती अथवा पत्नी, मुलगा व अविवाहित मुलगी यापैकी कोणत्याही एका व्यक्तीचा समावेश योजनेसाठी ग्राह्य धरण्यात येणार आहे. यामुळे शेतकऱ्यासह कुटुंबातील एक सदस्य अशा दोघांना या योजनेतून विमाकवच मिळणार आहे. 

अशी आहे स्थिती जिल्ह्यातून या योजनेच्या लाभासाठी २००८-०९ ते २०१८-१९ या कालावधीत एक हजार ६१८ प्रस्ताव दाखल झाले आहेत. ते प्रस्ताव संबंधित विमा कंपनीस सादर केले असून, त्यातील एक हजार ३८० प्रस्ताव मंजूर झाले आहेत. २२९ प्रस्ताव नामंजूर झाले असले, तरी त्यातील ३१ प्रस्ताव मंजुरीस पात्र आहेत. त्यातील १४ प्रस्ताव न्यायालयीन प्रक्रियेत आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com