धान खरेदी केंद्रासाठी शेतकऱ्यांचा रास्ता रोको

भंडारा  ः गेल्या दोन महिन्यांपासून बंद असलेले सालेभाटा येथील धान केंद्र सुरू करावे, या मागणीसाठी शेतकऱ्यांनी श्री छत्रपती शेतकरी संघटनेच्या नेतृत्वात सोमवारी (ता. २०) रास्तारोको आंदोलन केले. 

लाखनी तालुक्‍यातील सालेभाटा येथे असलेले धान खरेदी केंद्र गत दोन महिन्यांपासून बंद आहे. हे केंद्र त्वरित सुरू करण्याची शेतकऱ्यांची मागणी होती. प्रशासनाकडून मात्र त्यास प्रतिसाद मिळत नव्हता. अखेरीस संयम सुटलेल्या शेतकऱ्यांनी सालेभाटा येथील बसस्थानक चौकात ठिय्या आंदोलन केले. रस्ता रोखून धरल्यामुळे या मार्गावरील वाहतूक विस्कळित झाली होती. सोमवारी दुपारी एक वाजताच्या सुमारास नायब तहसीलदार दोनोडे यांनी आंदोलनस्थळी भेट देऊन आंदोलकांशी संवाद साधला. परंतु त्यातून काहीच तोडगा न निघाल्याने दुपारी चार वाजल्यापासून आंदोलक राज्य महामार्गावर पोचले.

या वेळी रस्त्यावर टायर जाळून वाहतूक रोखण्यात आली. आंदोलन उग्र होत असल्यामुळे पोलिसांची कुमक बोलावण्यात आली. उपविभागीय पोलीस अधिकारी बन्सोड यांनी आंदोलनकर्त्यांशी चर्चा केली. मात्र यावेळी देखील कुठलाही तोडगा निघाला नाही. अखेरीस तहसीलदार मल्लिक विराणी यांनी आंदोलकांशी संवाद साधला. यावेळी खरेदी विक्री सहकारी सोसायटीचे सभापती घनश्‍याम खेडीकर यांनी खरेदी केंद्र सुरू करण्याचे आश्‍वासन दिले. बारदान्या अभावी खरेदी बंद असल्याचे त्यांनी सांगितले. त्यानंतर जिल्हा पणन अधिकाऱ्यांशी बोलून तत्काळ पाच हजार बारदाना मागविण्यात आला. यात सुरुवातीला अडीच हजार बारदान्याचा पुरवठा करण्यात येणार आहे. त्यामुळे खरेदी केंद्र सुरु होणार असल्याची खात्री पटल्यानंतर आंदोलन मागे घेण्यात आले. लाखनी तालुक्‍यातील सालेभाटा केंद्रा अंतर्गंत दोन काटे बसविणे तर राजेगाव व गोंडसावरी येथे खरेदी केंद्र सुरू करण्याचे आदेश देण्यात आले. 

आंदोलनाचे नेतृत्व संघटनेचे अध्यक्ष मनोज पटले, सुरेश बोपचे, जिल्हा परिषद सदस्य ज्ञानेश्‍वर रहांगडाले, सुधाकर हटवार, भाष्कर जांभूळकर, दिगांबर जांभूळकर, मंगेश वाघमारे, हेमराज पटले यांनी केले.